為了實現媽媽遺願，我成為了女兒國唐僧: K675

我：「其實…妳哋個個都好靚，但我無人想溝…」
Q：「唔得，要揀最靚嗰個，唔要客觀答案，因為我知道情人眼裡出西施。」
我：「主觀嚟講，幽蘭真係好鬼死靚。」
Y：「死嘢吖，避重就輕，頭先人哋喺度唔見你同人講？」
我：「邊有喎，同埋我一早同佢講過，事實唔使成日講出嚟。」
Q：「呵，唔怪之得你成日嗌我靚女，真係傷心。」
Y：「傻嘅都知道幽蘭唔溝得，所以佢先成日黐住妳。」
Q：「欸，其實呢間房重有個單身嘅好選擇，你可以考慮下㗎。」佢望向戴住耳機嘅天王星。
我：「傻嘅知道幽蘭唔溝得，咁一定係弱智嘅先覺得可以溝女班長。」至少我暫時未見有人自掘墳墓。
Q：「啊，你死喇，呢句我要原封不動咁轉告畀佢聽。」




Y：「有無諗過佢只係喺度借啲意話妳弱智。」
呢兩個女人…喺度扮當我姐妹咁講嘢，實在係有啲煩。
Y：「不過今次多得兩個班長，攪到我哋要嘥時間練多首歌，都唔知講乜好。」
Q：「幾啱妳吖，上台表演多啲，隨時又多幾隻兵，話晒呢首歌好重小提琴戲份，邊有人知我彈緊bass。」
Y：「錯喇，啲觀眾其實唔係聽歌，只係嚟睇女，所以一定係妳同幽蘭殺晒，小心壁報板上面個信箱喳一聲爆晒。」
Q：「係喎，我哋唔止要練歌，睇嚟重要設計下服裝，難得上台可以豁免著校服，無理由要佢著住校裙打鼓㗎。」
Y：「可能佢無乜所謂，入面都係安全褲嚟㗎啦。」
我：「錯喇，對男仔嚟講，校裙入面係乜根本就無關痛癢，重要嘅係可以睇到裙嘅內部結構，理得妳入面係牛仔褲。」
Q，Y：「死鹹濕仔，都唔明佢做乜搵你做兵！」
Hea多陣，我哋都明白唔可以喺度再漚落去。




Q：「Uranus妳攰未呀，我哋都差唔多要走，一唔一齊食嘢呀？」
U：「唔喇，而家先第三版，我覺得一次過練效果會好啲，我夜啲先食啦，你哋幾個唔使理我。」對於佢嘅努力不懈我當然好欣賞，又有啲期望佢會搞唔掂，好矛盾。
Y：「都知妳唔練到散唔會停㗎喇，唔好整傷手就得。」
Q：「得妳一個喺度小心啲呀，雖然話今晚唔會有人嚟啫，但難保啲負責人想上嚟八掛下…」
U：「妳同我定啦，普通男仔唔會攪到我，就連佢…」
我：「咁有其他男仔勁過我好多㗎嘛，總之有問題就即刻搵我哋幫手啦，點知會唔會成堆仔上嚟。」
Y：「嘩，咁呢啲場面一定好適合佢。」