為了實現媽媽遺願，我成為了女兒國唐僧: K676

Q：「唔啦，由妳嚟幫手頂晒佢先係合情合理。」
U：「知妳兩個姣婆關心我喇，捉埋佢去玩啦，我重要繼續專心練多陣…」隨時打到我放工都似。
離開咗band房，我哋就是但去咗間茶餐廳食嘢；坐卡位，佢兩個一邊我喺另一邊其實就好正路嘅。
Y：「喂，畀團長打pat開唔開心呀？」
Q：「無話特別開心嘅，不過佢咁靚仔，OK咁囉。」
Y：「妳睇下妳吖，人哋一眼就知道妳好玩得。」
Q：「乜喎，呢啲只係比較式，唔通話Zilvia玩得咩…老實講，妳應該都識咗人哋好耐，有無諗過食埋佢。」
Y：「呢隻嘢喺度㗎喎，講咁多會唔會唔係幾好？」扮吖…
Q：「佢雖然一無是處，但都識分寸把口唔會亂講嘢嘅，佢以前咪更加亂七八糟，邊有資格話我哋喎。」
Y：「團長…我中一暑假識佢囉，嗰陣啱啱分手有少少迷佢嘅，但佢邊會理我呢個細路女，況且佢出面大把女。」




Q：「都理解嘅，咁而家妳大個女又有仔，可以打返個和。」哦，原來係負負得正，OO得A，我明白了…
Y：「邊有咁易吖，除非環境因素啦，佢又唔係亂咁玩女啲人，如果唔係佢打完妳pat一早有其他舉動啦，話時話做乜要講到我係仔都唔放過咁，又唔見妳食埋佢。」
Q：「這個嘛…嗯，暫時未吸引到我囉。」
我：「喂…雖然我唔夠人靚仔啫，畀返少少人權我好唔好？」其實我早知對佢哋嚟講，我只係一個好玩安全嘅選擇，正如我有乜事都可能想搵細蚊先一樣。
Q：「點啫，言下之意即係你好想食咗我係咪？」
我：「咪傻啦，妳都知我哋唔係呢種關係嚟…」
Q：「唉，其實可能都知你唔會鍾意我㗎喇，一定覺得我呢啲港女又㤿憸又麻煩，只係被迫坐我隔籬，啱唔啱？」
我：「雖然有一半係事實，但女神就係女神，識到妳都好開心嘅。」
Q：「係咩，唔係嫌我唔派兵糧咩，唔似得娘娘惜咗妳一啖咁大方，係我都識轉會啦。」
我：「邊有喎，惜唔惜呢啲好閒，唔係我揀朋友嘅準則。」再咁同佢兩個謦落去我遲早想投河自盡。




Y：「咁又係，你隨時可以喺學校對面攬女嘴對嘴。」
Q：「係咪羨慕呢，妳都可以考慮下同佢咁做。」
Y：「我先無咁唔知醜，就算同條仔都唔會啦，乜妳會同條仔喺學校門口親熱㗎咩？」
Q：「講起就好笑，其實我又唔係話咁有所謂嘅，喺佢校門嘅話，佢俾人講咋嘛，不過佢次次都約我喺母雷公咁遠見，睇嚟就唔多想俾其他同學見到。」