為了實現媽媽遺願，我成為了女兒國唐僧: K674

Y：「其實我哋有form㗎啦，就算要下個禮拜上台都問題不大，只不過班長佢…應該未想走住，陪多佢一陣先。」
其實係人都知，除咗佢妳哋幾個不朽可以隨時開show，經歷完QQ嘅粉絲見面會就更加感受到。
Q：「睇個樣佢應該有排都未走…你兩個喺度培養下感情囉。」QQ妳發乜神經，講埋啲咁出奇蛋嘅嘢。
Y：「黐線，借嚟用下啫，鬼得閒同佢培養感情。」
Q：「嘻，點知妳條仔會唔會又激親妳，搵佢玩下咪可以平衡返，就算無感情可以有其他嘅啫。」
Y：「呢啲咁大逆不道嘅事留返畀妳做，唔好預我。」
Q：「係呢，其實你而家有無溝緊女㗎？」佢…係望住我講；當然YY亦唔應該會溝女，妳到底想點？
係喎，佢問埋呢啲白癡嘢就可以顯得我哋兩個無咁熟絡，但喺YY眼中呢啲簡直係笑話，雖然佢又忍得住笑。
我：「無呀，邊有女受溝喎…」
Y：「你唔係喺度追緊佢㗎咩，咁又點會有人受溝。」整鬼咯，妳哋對呢個遊戲夠晒樂在其中。




Q：「咪亂講，我O㗎，點會俾佢溝我。」
Y：「你主人話唔俾喎，咁你想唔想溝佢？」
我：「咪玩我啦，溝乜鬼喎…而家咁樣唔係幾好咩。」
Y：「你咁曳，無女溝唔會好悶咩？成日得個睇字。」
Q：「溝佢啦，就算唔受，佢會喺度自high㗎。」
Y：「咪老屈我啦，我從來都無呢個需要。」
Q：「係咩，明明上年開學男班長搵妳玩得幾開心。」
Y：「佢係喺度煩住晒，我先整鬼佢，人哋鍾意嗰個係妳，我先唔會奪人所好，可能佢想靠近我嚟追妳㗎咋。」
Q：「使鬼咩，一早叫佢唔好浪費時間，來來去去淨係搵啲靚女，所以先咁耐都無拖拍。」女神們嘅對話實在有夠大言不慚，因為口中嘅靚女正是妳哋。
Y：「呢啲叫有要求呀，都學唔識腳踏實地，如果唔係一早好似佢咁周街攬女啦。」永遠都係燒返我嘅。




我：「無啦，短聚啫…佢早就唔係我條女。」
Q：「人哋重肯攬你，點解唔同佢玩多啲？」
我：「或者…可能…因為，感覺都追不回來。」
Y：「我就話佢學咗班長啲衰嘢，對得靚女多已經睇唔上屋邨妹，加埋可能以前已經食厭咗。」妳哋真狠毒。
我：「唔係嘅，佢幾好㗎，只係唔想蝦佢。」
Y：「佢幾好，但隔籬有個好好多，傻嘅都識揀啦。」
Q：「無錯，你已經有個新嘅最好嘅娘娘，以後唔好成日煩住我喇，搵日我要同Miss申請調位至得。」
Y：「問你一條問題吖，我哋班邊個女仔最靚？你最想溝嘅係邊個？先唔好理佢有無男朋友。」
Q：「唉，妳咁樣迫人讚妳都有嘅，雖然佢係妳隻兵啫。」呢兩個八婆，我想慢慢講句嘢都唔得嘅。