為了實現媽媽遺願，我成為了女兒國唐僧: K667

Y：「呢嚿嘢新奇有趣，唔似得我哋玩嗰啲咁悶。」
A：「入面有啲BB訓練模式，建議妳玩勻晒先，唔好諗住坐低就有可能玩到真嘅樂曲，另外個下降速度係有得較嘅，妳可以試一個自己啱心水嘅速度。」
然之後天王星入咗去第一個訓練，內容類似係左左左左右右右右，試完手就試腳，大約每秒打兩下咁；而結果當然係…慘不忍睹，四五十粒中得嗰十零粒，重要係擦晒邊嗰隻，估計佢玩太鼓都係不可更不良㗎喇。
A：「嗯…有啲慘情，我就唔好意思捉住妳隻手仔嚟教喇，睇下妳啲姐妹幫唔幫到妳啦。」
V：「不如試下俾我幫妳？」然之後再一次入去訓練，今次隻手嗰邊差唔到中晒，但腳就真係無能為力。
U：「幽蘭妳識打鼓嘅？」
V：「唔識呀，不過每樣樂器都有相似嘅地方，最重要係節奏感。」今勻真係對牛彈琴咯，妳就話八級啫…
天王星再自己試多次，只係隻手好咗少少咁大把中多兩三粒，隻腳仍然係全部落晒坑，甚至乎係硬咗軚唔識郁，估唔到呢對識跑識踢人嘅臭腳都會有失威嘅一日。
U：「點算…估唔到咁難…」文武全才係唔包樂嘅。
V：「介唔介意俾我試下真嗰份譜大概係點樣。」




U：「好…我都想知對妳嚟講究竟會有幾難。」
頭先團長坐低好輕鬆就打中晒，今次換咗幽蘭上去，雖然未至於好似天王星咁，但打中嘅都係一半唔夠，大約只係三份一，重以為佢唔會差過團長好多。
U：「點算…就連妳都只可以玩成咁…」
V：「原來…用晒手腳會好lag，全部都反應唔切…」
A：「無咁易㗎，不過以妳資質應該玩一個禮拜就可以handle到呢首歌，至於佢…算啦，妳哋由得佢練住先，我都要教下妳哋點set啲電子樂器。」
團長第一個教嘅係Zilvia，唔通佢對乖乖女情有獨鍾？
幽蘭同QQ就走去研究下部鍵盤…嗯，但呢部又大部過屋企嗰部好多，好似係有另一個名…我唔好意思打攪佢哋於是就入返錄音室，戴埋個耳機，插下啲線，咁啱插中出面Zilvia又啱啱插嘅線，有啲好簡單嘅結他聲，然後我又再插多條線試下，結果聽到天王星亂打鼓嘅聲…
掹返出嚟好似好對佢唔住，唯有用細lin頭較細聲佢。
當我插晒所有線，就乜聲都有啲，亂七八糟咁，YY走過嚟我身邊用手語問我聽唔聽到佢拉小提琴，我話OK，然後佢好落力拉，咁我就較下啲通道聲量，然後佢就更加落力拉，其實我係喺度聽緊QQ啲琴bass聲，但就望住YY跟住佢節奏一路捹頭…