為了實現媽媽遺願，我成為了女兒國唐僧: K668

玩咗一輪開始學識點用個panel處理啲噪音，但其實無論點處理都係噪音嚟，唯一辦法就係熄聲，或者掹返晒啲線出嚟，尤其係鼓聲條通道…
樂器嘅嘢我真係識條鐵，攪多陣YY就捉返我出去。
A：「欸…我諗妳哋而家對手頭上嘅樂器開始有初步認識，咁想問下，夾band就一定有人唱歌嘅，妳哋應該唔會有主音？係合唱定點？」
Y：「未諗過，但應該唔會有主唱㗎喇，睇個款。」
V：「我諗…每個人輪流唱幾句，好似啲女團咁？」
A：「女團要跳埋舞㗎喎，妳哋邊有咁多隻手，anyway，妳哋唔係夾開band就更加要利用科技，因為科技實在係太偉大，嗱，呢度係一set有鑑聽功能嘅無線頭戴式咪…嗯，真係講完都驚咬親條脷，另外呢部就係支援六channel嘅無線咪server，兼支援aux同混音，用得好嘅話對live演出會有好大影響，基本上而家啲idol都係靠呢啲嘢先搵到食，至於點先用得好就靠妳哋發掘喇，成set貴到嚇死人嘅嘢都預嗰日借埋畀妳哋，至於我…今晚重有function，所而下次再見嘞，而家走先。」
團長真係團長，bye都無句就消失咗。
無咗大人喺度，班小妹妹又開始亂咁嚟。
Q：「不如…我哋jam下啲本身識嘅歌先睇下會有乜效果好唔好？」
Y：「好就好，但我同妳無問題啫，佢兩個唔係玩開結他，一時之間唔可以無中生有㗎喎，點都要搵譜練下。」




V：「OK嘅，如果搵到譜，一般key嘅melodic pattern我都可以視奏，流行曲應該唔太難。」
Z：「如果妳哋唔介意我一個小節掃一下chord嘅話…」
Q：「梗係無所謂！不如我哋就試下Lydia。」
四條女玩得開心，結果就冷落咗天王星，但呢個係無辦法嘅，佢點都要由頭練起，就算唔使睇譜唔使學節奏佢都要練到個反應至得，所以根本唔得閒理佢哋，我望一望佢發現已經有進步，起碼四肢分解都可以打得中晒，雖然唔太準，而我都係專注返排制好過。
Q同Y好快已經彈緊，而另外兩個就開始對譜加入，我喺個錄音室入面想聽邊個就邊個，呢種感覺幾過癮。
Y：「喂，死仔包！可唔可以試下幫我哋錄音？」雖然團長已經走咗，但佢重當緊我係佢隻兵，服咗佢。
我：「可以，無問題。」當然我已經偷偷試錄過。