為了實現媽媽遺願，我成為了女兒國唐僧: K666

A：「呀，我又無話係我出手，妳咁緊張做乜呢？Queenie，而家有人遲過妳，妳可以報返仇喇。」
V：「吓？講真㗎？我會怕醜㗎…啪！嘩！」呢個QQ又跟住癲埋一份，一嘢大力打咗落去，好似…好爽。
A：「好，玩夠喇，同大家講返先，呢度係一間band房，亦都係一間錄音室嚟，係我嘅朋友開嘅，喺嚟緊呢一個月，如無意外星期二四都唔會有人用，另外星期日晚八點後都係，妳哋可以喺呢啲時候過嚟練習。」
U：「非常感謝…咁時間上應該幾充裕。」
V：「咁請問呢度嘅場租係幾錢？」
A：「錢錢錢…成日都係錢！有錢女行有餘力就自己開studio啦，我已經同朋友謦掂數所以free畀妳哋，另外我已經警告咗佢唔可以嚟騷擾妳哋，不過呢度係有cam嘅，所以妳哋自己執生啦，如果覺得自己欠咗人哋歡迎搵我聯絡佢肉償返。」
U：「拜托你哋唔好咁變態得唔得。」
A：「唔關我事㗎，人哋係band友我唔係，人哋玩音樂有女食，我玩音樂唔食女的…算喇，唔廢話，呢度有首歌嘅譜，兩份結他譜，一份假bass譜，至於琴同keyboard譜就由有錢女話事，呢間房嘅樂器妳哋可以隨便用，預埋嗰日借畀妳哋，我都幫唔到啲乜。」
U：「咁請問…我打鼓嗰度點算？」
A：「妳，係個大麻煩，必須要被解決，呢度係一set爵士鼓，如果妳亂咁敲落去，就會嘈死人。」團長隨即攞起枝鼓棍cosplay唐伯虎，製造咗一堆噪音出嚟。


U：「我知道，咁你係咪真係有辦法幫到我？」
A：「係睇在妳班姐妹份上先會幫妳，過嚟，呢度係一set電子鼓，打落去無乜聲，妳可以戴住耳機玩。」
U：「我知道，但問題係我可以點學得識？」
A：「妳有無玩過太鼓之達人？」
U：「有，細個嗰陣玩過幾次，但係一啲都唔叻。」
A：「咁就得，放心，叻都唔會幫得妳幾多，呢個係一套叫DTX嘅system，雖然而家已經無乜人用，但如果妳玩得掂就可以解決好多問題。」團長打開咗部notebook放喺鼓架上面，㩒咗一堆制打開個程式，然後就有個好似game嘅物體，啲音符喺個頂跌落嚟。
簡單嚟講即係嗰陣時QQ喺我部電腦彈琴裝嗰隻軟件，只不過而家變咗打鼓，團長隨即坐埋上去霹靂啪嘞咁打咗一分鐘，當然粒粒都中到應一應。
A：「嗱，就係咁，得個零月無可能學得識打鼓㗎嘞，份譜我已經打咗入去隻軟件度，妳玩到幾多就得幾多，不過妳到時打嘅就係真鼓，同埋只係望住個mon段video。」
U：「咁我試下啦…妳哋個個望住我做乜？」