為了實現媽媽遺願，我成為了女兒國唐僧: K665

Y：「幽蘭話佢三分鐘之後嚟到。」
A：「好，咁等埋佢先，妳哋可以隨便參觀下，牆上面嘅guitar同bass可以自己攞嚟玩，如果妳哋識玩嘅話…嚟，媱媱過嚟，呢部玩具暫時借畀妳用住先。」
就係佢嗰陣時喺遊艇上面拉嘅電子小提琴，一個紫黑色嘅框，遠睇比較似RPG勇者遊戲入面啲魔法杖。
Y：「會唔會唔係幾好，呢個明明係你嘅玩具嚟。」
A：「點會唔好，始終妳拉小提琴都係叻過我，如果妳唔借嚟用唔通專登走去買部咩。」
Y：「又唔係唔得嘅…咁，呢幾個月就幫你保管住佢啦。」
A：「如果妳覺得唔好意思，可以交換返啲嘢嚟畀我玩嘅。」呢個團長老鬼到…有邊個女仔唔會俾佢征服喎。
Y：「唔好啦，我應該無乜嘢可以畀你玩。」
A：「有呀，呢隻嘢好似幾好玩。」佢指住我。
Y：「哦，攞去啦，玩完還返畀我就得。」妳！正港女…


我：「且慢，我係乖乖嘅男仔，係唔會掂其他男嘅。」
A：「唔使咁緊張，見你咁得意，我可以托我啲女人嚟玩謝你㗎嘛。」
我：「咦，咁又可以諗下噃，都係少少犧牲啫…」
Y：「你…諗清楚先好呀，佢啲女人隨時唔係人咁品㗎！」
我：「咁…妳陪佢玩啦…都係唔好攪我好啲。」
A：「喂，咪行開住，我唔得閒攪你，但你要同我搞掂呢間房啲嘢。」驟眼望落係一間錄音室，好多器材…
我：「吓，唔好啦，成間房都係制，我唔識㗎…」
A：「唔使咁緊張，你只會用到呢間房三%嘅功能啫，你當佢係女人咁玩就得，雖然副body係有好多part，但係刺激到啲功能嘅地方永遠係得兩三點㗎咋。」
Y：「喂，好喇下，你咪再教壞佢。」
A：「使鬼我教咩，就唔信妳一早無教壞佢，定係唔知係咪佢教壞妳，嗱，呢粒最大嘅lin頭就係負責大細聲。」


第一次見到YY完全無一個男人符，就連頭先QQ俾佢打pat都無反抗，又係嘅，如果我係女都逆來順受啦。
嗱，逆來順受絕對唔等於來者不拒呀下。
A：「嗱，呢度有啲input線代表住唔同嘅…通道，咁樣抽插下，對住啲窿仔，就可以揀到出面嘅聲源，記住唔好插得太大力，用緊嗰陣唔好插來插去，會爆音嘅。」
其實我深信佢係認真教緊我嘅，除非唔係。
A：「呢度行double system，你可以用扭扭制又得，你鍾意呢度推上去用軟件整亦得，總之你咪諗辦法調到啲聲平衡舒服，再唔係就玩埋EQ，都係…自己試啦。」
我唔係話唔鍾意玩呢啲，但將天王星嘅賽果押喺我手上，我實在係孭唔起條飛，萬一輸咗我容乜易JJ不保㗎…
V：「唷！我嚟到喇！係咪等咗好耐呀？」呢個精神病女孩…對住佢哋幾個姐妹真係特別開心，但呢種狂喜唔知算唔算都係精神病嘅一種呢？
A：「係，等咗好耐喇，呢度規矩遲到係要打pat pat。」
Y：「死變態！你打我就算啦，咪攪佢哋呀。」