thriXt Qantasy 純文字安眠之作 (New: - U2K - 一直上架): K662

Y：「又可能係因為妳太關心其他男仔。」
龜：「欸…其實妳哋唔使理我就得，由得我啦。」
Y：「頭先見到主席食晒你啲肉，係咪唔夠飽？呢度重有咕嚕肉剩返。」佢一路講一路用筷子夾起放喺佢面前。
龜：「欸，呢對係妳嘅筷子嚟…」
Y：「係咪嫌我口水尾污糟呀？咁我去攞返你對筷子。」
龜：「唔係…點會喎，咁我咪會整污糟妳對筷子。」
Y：「無所謂，我已經食飽咗，點呀，係咪要西野七瀨喂你你先肯擘大個口？」
龜：「吓…唔係呀，但七瀨已經畢咗業好耐好耐…」雖然佢繼續努力為佢嘅偶像澄清，但亦都乖乖擘大個口。
Q：「你小心啲呀，唔好啜到佢隻筷子呀，如果唔係食得太多口水尾就會學咗呢啲友咁聽晒佢話。」
Y：「係咩，咁似乎佢每日八杯水好多都由妳提供咁喎。」然而細龜又真係小心翼翼咁用牙夾走筷子上面嘅肉。




J：「係呢，你淨係迷乃木坂㗎咋？其實而家好多韓國女團都好精彩㗎喎，例如IVE同TWICE咁，啲歌又好聽。」
龜：「我諗，有乃木坂就夠㗎喇…」揀係夠啦，人數上嚟講嘅話，一團都等於人哋七八團咁滯，人名都記唔掂。
事實上關於韓風同和風，好似係得啲女先會咁鍾意迷韓團，無論男團女團都係，而仔就點都鍾意日本多啲，我諗原因係我哋鍾意睇卡通同打機掛，另外就係得日本先有咁多AV女優，韓國根本就無呢個產業咁滯，得啲掛羊頭賣狗肉係咁迫啲三線女星露波波嘅垃圾cult片。
Z：「我都飽喇，幫手食啲啦。」佢又夾埋一份。
龜：「吓…係半塊蝦餅？」
Z：「放心啦，唔係我咬出嚟㗎，係用刀切嘅。」
我：「其實妳哋唔一定要迫佢嘅，問下我都得。」
Z：「Yvonne惜完你，乜都已經飽晒啦。」
無無聊聊，胡胡混混，我哋完成咗今晚嘅聚餐，而我同QQ又要前後腳返屋企。
Q：「呀，次次都要兜大個圈先返到嚟，真係人都癲！」




我：「預咗㗎啦，以前妳要搭埋車先有得返屋企咪又係咁。」呢個時候我喺度檢查緊易汪畀我嗰袋嘢。
Q：「咁而家慣咗行兩步路就返到嚟吖嘛…嘩，呢個女人攪乜鬼，做乜對你咁好呀？」
我：「好好咩？似乎係搵我笨多啲…」我都唔識形容。
Q：「Stussy T三四嚿，Baby Milo T四五嚿，LEVIS Vintage褲千幾二千，Diesel真皮belt成千，對波鞋要過千添，唔係惜到你燶喇咩？」佢攞上手如數家珍咁。
我：「咁佢要搵我做樣啫，又無話送畀我嘅。」
Q：「畀你著完重會唔會要你還呀，或者你霸住佢囉。」
我：「唓，我對呢啲嘢都無興趣嘅，唔係衣不蔽體就得㗎啦。」買咁多靚衫褲鞋襪不如食咗佢重比較實際。
Q：「喂，我問你，其實你同易汪係咪有啲嘢？」