為了實現媽媽遺願，我成為了女兒國唐僧: K661

Y：「唉，妳哋真係…派喇派喇，你係受先好呀下，唔好話我非禮你然後同女神投訴。」
我：「點會喎，我唔強求，但亦唔會抗拒靚女…」
Y：「死仔包抹嘴啦，重要啷埋口呀，唔想掂到你嘴唇啲茄汁。」女神叫到我亦唯有乖乖聽命。
U：「聽話得你吖，果然係超專業嘅兵嚟。」
Y：「嗱，就咁掂一下㗎咋，唔好幻想咁多，我已經有仔，個頭唔好郁望上嚟。」然後嘴咗落嚟兩秒左右。
Z：「原來真係可以…唔通Queenie平時都係咁？」
Q：「點會…我先無呢隻嘢咁隨便。」
Y：「唓，妳唔認就算數，無人迫妳，但真係完全無特別，妳睇呢條仆街仔乜反應都無咁。」
我：「呀，小小開心啦，都係俾靚女惜一啖啫…」認真，平時同妳哋玩到咁黐線點會惜一下就會有大反應。
好似有幾個人消失咗咁，其實細龜都望到呆晒。




Z：「原來真係可以隨便惜男仔，咁係咪邊個都得…」
Y：「又未至於嘅，呢啲嘢要睇整體效果。」
J：「如果要妳惜阿健妳制唔制？」
健：「唔好亂講啦，我邊似得呢條友咁隨便。」
Y：「對你無興趣，無癮，你留返嚟溫女啦，制唔制同舒唔舒服係兩回事嚟，係揀都揀細龜先。」呢個賤酷世界…
細龜聽完當場呆咗，一面懵B咁坐咗喺度。
J：「哎，Y姐姐話要送你一個香吻呀，過嚟接收啦。」
龜：「我認為，呢啲嘢攞嚟玩玩下…其實就唔係太好嘅。」經過上次一鑊都知佢個傻瓜係有幾認真，只不過佢心中嘅認真絕對係會玩著人哋。
U：「哎吔，你就唔好咁摺啦，我同你調位，你過去同佢哋幾個交流下啦。」天王星一嘢就捉住佢胳肋底秤佢過去，唔知點解我覺得有啲送羊入虎口嘅感覺。
豬：「女班長，請問妳走過嚟係有乜貴幹？」




U：「我想討論一下班會費嘅問題。」實際得妳吖。
豬：「我明白，其實班會費無乜點郁過，但係如果聖誕前又要大家再交錢嘅話相信迴響係唔會細。」
懶得理呢邊，都係睇女人逗弄烏龜比較有趣。
Y：「放心，我係唔會惜你，費事嚇親你。」
龜：「多謝妳嘅諒解。」呢啲乜柒對話嚟…
J：「喂，我想問下呢，其實細龜你係咪鍾意女仔㗎？」
龜：「咁就，都係嘅…」尤其係唔露面但露肉嗰啲。
Q：「點會唔係吖，佢好迷乃木坂㗎。」
龜：「呀，點解妳又會知嘅？」呢啲宅男真係活喺自己個世界度㗎喎，明明人哋彈咗咁多次乃木坂畀你聽。
Q：「你成日喺學校上乃木坂官網，又偷偷玩佢哋隻game，有乜可能唔知喎…」




龜：「噢…對唔住，希望無騷擾到妳啦。」
Y：「妳又真係關心同學嘅啫，我喺佢隔籬都唔知添。」
Q：「可能因為係坐喺後面所以睇得比較清楚啲掛。」