為了實現媽媽遺願，我成為了女兒國唐僧: K663

我：「吓…點會喎，我可以同佢有啲乜嘢？」
Q：「佢唔止借你嚟做兵，重惜埋你添喎。」
我：「佢搵我嚟玩啫，同埋啲咁嘅女人都唔當惜惜係一回事㗎啦，先唔會理啲咁無情調嘅女人。」
Q：「係咩？乜你唔係來者不拒嘅咩，雖然惜惜又的確好似唔係啲乜嘢一回事…」佢講完又啄咗我幾下。
我：「哎吔…總之我同佢無嘢，差唔多又要落返去開工喇。」雖然好鍾意俾佢惜，但佢啲眼神又真係…
我又唔係妳條仔，妳自己又有仔，關心我同易汪嚟做乜啫，妳唔鍾意咪去炮轟返個好姐妹囉，或者惜返佢條仔嚟報仇，橫掂都幾靚仔吖…
到咗第二日，炒完個靚飯之後食埋又要準備出門口，好彩團長約咗佢哋晏晝咋，如果唔係我就命都短幾年。
Q：「呀，你條友仔竟然為咗個女人gel頭？」
我：「唉，我想嘅咩，做戲做全套咋，無理由著咁多嘢上身但個頭重係雀巢咁㗎。」我都唔明整靚個頭有乜咁不羈，明明戴住個雀巢頭，食住雀巢朱古力，然後喺個屋邨入面周圍躝先係真正嘅不羈囉好無。
Q：「頂你，唔係咁㗎，而家叫你cos巴魯坦星人咩！」睇唔順眼嘅QQ終於使出佢嘅雙手嚟處理掉我。




Q：「搞掂，可以出門口嘞。」
我：「咁妳使唔使攞埋呢嚿嘢出去呀？」個鍵盤囉…
Q：「唔使呀，佢哋話無嘢要準備，就算我攞埋去佢哋都唔會有電結他㗎喇，又成包米咁重。」
我：「咁就出門口啦…我好似要去meet咗個八婆先。」
Q：「哦，睇嚟你好掛住人哋咁喎。」
我：「無啲咁嘅事，係佢話好似要有啲準備工作。」
Q：「咁你都可以同我一齊去到先嘅啫，家陣你係咪有娘娘就唔想理我咁話喇下？」
我：「點會，梗係一齊出去啦，幾個地鐵站啫。」
點知落到樓下QQ又話危機四伏所以叫我自己去先，真係吹脹，雖然我都覺得好危險，而且鑽石山又係佢條仔嘅地頭，去到之後就見到YY，佢捉咗我上去一個無人嘅角落…
Y：「咦，唔錯喎，睇嚟你女人有同你執過下。」佢講嘅時候又tune下我條belt，雖然我唔明突出嚟嗰少少有乜差別，正如我唔會明點解個個女仔都有一枝以上嘅手忌廉…




我：「咪講笑啦，佢又點會係我嘅女人喎。」
Y：「點知你哋，或者你已經夾硬令到佢已經變成你個女人嚟呢？」YY啲眼神真係好蠱惑，加埋條放假嘅眼線…
我：「我邊係啲咁嘅人喎，YY…我…可唔可以同妳惜惜？」
Y：「你係咪黐咗線，知唔知道你而家喺度講緊乜？」
我：「知呀，純粹琴日唔夠喉啫，又係妳話惜惜其實無乜嘢。」諗多兩諗先發覺琴日我一日內惜咗三個女仔。
Y：「係無乜嘢…但我哋都唔係嗰種關係！」
我：「係無關係呀，但想惜下啫，唔會迫妳嘅，又或者如果妳覺得背叛咗男朋友嘅話就算啦。」