為了實現媽媽遺願，我成為了女兒國唐僧: K659

而作為一個稱職嘅服務生，我當然係要負責埋捧餐；對於幾個女神嚟講我絕對心甘命抵，健仔平時幾幫得手，細龜都叫有出錢助養QQ，但點解我次次都要幫肥豬手？
到我開飯嗰陣肥豬已經食咗一碟牛肉，而佢同細龜亦好有默契咁喺度以物易物，得到咗丸同餃嘅細龜睇嚟就好開心，另一邊嘅豬兄就非常純熟地十二秒一塊七成熟牛肉…
物與物相殘…小弟認為身為豬係唔應該食咁多牛。
呢種聚餐格式…其實同lunch一齊出嚟食飯有乜分別？只係大家咁啱一齊返學，咁啱一齊食飯，我同健仔對望住都有啲無奈；不過無所謂啦，辛苦完一輪令我賺咗六張五蚊券，兩份甂爐同扒又令我打咗四十蚊斧頭差價。
U：「唉，最衰你哋喺隔籬攪到唔可以講衰嘢。」
我：「點會呢，女神把口講啲乜都唔會衰，一定動聽悅耳，繞樑三日，何況出口成文呢。」我暗串佢爛口。
健：「佢都衰到貼地，妳哋講乜都唔驚啦。」
U：「咁又唔係嘅，重有你喺度，費事教壞你啦。」唓，唔教都壞㗎啦，晨咁早就鍾意睇人波波，不過妳哋真係當另外兩隻脊椎類動物無到㗎喎，雖然喺第二個次元。
健：「唔會嘅，係都俾呢條友教壞咗先。」
J：「聽聞有人啱啱識到女已經學壞咗喇喎。」


健：「邊…邊有啲咁嘅事，係識到啫，無學壞。」否認得咁快，咪盞令到柯南更加易搵到真兇。
J：「如果學唔壞，咁識嚟做乜？」嘩！係真理呀！
健：「無…互相認識下…交流下。」唉，好心就誠實啲啦，明明就係除衫認識下異性性器官，再交流下體液。
Q：「呀！我有嗰位姐姐嘅相，妳哋想唔想睇下咁呀？」
U：「吓，點解會有嘅，妳點樣八到返嚟㗎？」
Q：「呢啲…多謝佢朋友囉，聽聞係打機識返嚟嘅。」你個QQ作得就作，明明就係因為妳而識返嚟。
健：「有乜好睇喎，又唔係真係女朋友嚟…唔好啦。」
Q：「有乜所謂喎，話晒佢都叫幾靚女。」QQ又點會聽佢枝笛，重要一路開相一路對住佢伸脷。
啲女仔實在係八到出汁，明明Zilvia對男女之情係零興趣都要伸個頭埋去望，真係服咗佢哋。
U：「個女仔個樣好似真係幾大個下。」


Q：「大少少咁啦，人哋係大學生嚟。」
Z：「嘩，犀利喎，估唔到。」
J：「樣就唔評論喇，一定唔係醜樣先，但你應該會幾開心，似乎。」好心妳哋咪咁老司機啦。
健：「請問…幾開心，即係乜嘢意思…」
Y：「即係有得做啲好開心嘅嘢咁嘅意思。」
J：「嗯，就係同妳男朋友一樣咁開心嘅意思。」
Y：「啊，唔通妳男朋友就好唔開心喇咩？」
Q：「妳兩個女人唔使禮讓喇，一樣咁開心，打和好未？」