為了實現媽媽遺願，我成為了女兒國唐僧: K658

V：「嗯，當妳應承咗我㗎喇，唔准講大話㗎。」呢兩姐妹嘅深厚感情實在唔係我哋旁人可以理解到。
送走幽蘭之後，我哋一行九人大伙兒浩浩蕩蕩咁操去大家樂，由於時間尚早六點未夠嘅關係，茶客啱啱散晒，晚餐嘅又未嚟到，就算我哋一行九人都可以成功霸到連續四四二枱嘅組合，五條女佔據咗一點五張四人枱，我同阿健霸半張，而豬同龜就喺一張二人枱度。
呢種聚餐格式夠晒特別，證明學生呢種生物係絕對唔受社會規範限制，可以將狂想應用喺生活層面。
Q：「好，大家可以準備點菜喇。」
U：「咁妳哋諗住嗌乜，我出去買啦。」
Q：「邊使勞煩我哋呢，呢度有服務員㗎嘛！」屌，QQ妳…做乜又要望住我，上次陸運會茶餐廳一役重未玩夠我咩？雖然我係呢行嘅專業從業員。
我：「健仔，你聽日上工，不如而家練習下先？」
Q：「你唔使搵自己兄弟笨喇，我都只係為你著想㗎咋，你平時咁鍾意儲印花，呢度一次過可以畀你儲到N個印花，滿足你N個願望，你啲優惠券想點就點啦，我哋會計返原價畀你唔會要你蝕。」
女神所言的確非常有道理，但呢度實在係太多人，可惜我似乎搵唔到一個體面咁拒絕嘅道理。
豬：「一份雙牛，一份豬牛甂爐。」又係你個主席…




然而…我已經無能力阻止佢哋繼續點餐。
Y：「靚女，妳都真係幾透澈瞭解呢隻嘢㗎喎。」
Q：「少少咁啦，不過妳要接手㗎喇，靚女好好努力。」
U：「其實…我都有啲想問下妳兩個到底喺度玩乜鬼？」
J：「或者係欲拒還迎。」
豬：「重係以退為進！」
Z：「可能係你哋多心，其實只係孔融讓梨。」
健：「欸，我想問下點解要用呢個成語嘅？」
Z：「我諗…因為孔融唔鍾意食梨掛。」
U：「講得好，哈哈…呢個真係爛橙嚟，唔該我哋要第一三四六個中餐唔使湯要小飯，再加兩個牛扒餐。」




健：「我要一哥得喇，唔使你記咁多嘢。」
你哋班友…擺明就係喺度玩；於是乎我就乖乖去㩒機點餐，而為咗儲印花嘅關係我一共拆開十張單，嘟八達通都嘟到手跛，又要套啲券落佢哋度再收返原價，好彩我醒目嗌咗要等最耐嘅扒餐先，但到我㩒第六個嗰陣已經開始出緊餐，趕到好似玩女神餐館咁。