為了實現媽媽遺願，我成為了女兒國唐僧: K657

U：「M1派得嗰3%多啲，M2就派到4%，當然啦。」
V：「又唔可以咁講嘅，因為有堆叻嘅走晒去M2擦分，渣嘅就drop鬼晒，而M1會有好多文商科為讀而讀，所以唔可以剩用比例嚟計，唔代表亂揀M2會比較著數。」
慕：「欸，難得週末返嚟整嘢，不如唔好講學業…」
U：「咁，其實塊board已經叫做完成咗，不如…一陣去食返餐，當係慶功宴？好唔好？」
V：「吓…我無講定喎，要返屋企交人，嗚…」
U：「咁我都無辦法，下次先囉，其他人O唔OK？」
慕：「欸…其實呢，我就約咗佢哋今晚練band，就連房都卜埋，不過如果只係一陣間…」
U：「如果爭緊個主音結他同主唱重練乜鬼喎，唔好勉強啦。」真心唔知佢係有骨定關心同學。
慕：「嗯，咁你哋食得開心啲，我下次再join啦，其實班友仔已經喺度等緊我，咁我行先喇。」
我覺得佢都算係咁啦，同天王星關係麻麻，其他女又有得 睇無得溝，更加無自己朋友喺度，係礙於班長身份關係都肯返嚟幫咁耐手，又唔算偷懶。




U：「咁即係其他人都OK啦，大家想去邊呀？」
呢啲時候，通常全場人就會靜晒，而我最擔心嘅就係有人提議去我間酒樓，sor，唔係我嘅，係我返工間酒樓度食，雖然唔係未試過，但我就係唔多鍾意咁樣。
U：「呀，班會主席，你有無乜提議呀？」
豬：「我比較自由，不如妳問咗啲有顧慮嘅人先啦。」條肥仔一路喺度砌數獨棋盤一路答。
我：「其實我都無乜所謂，盡量唔好貴過一百就得…」
U：「呢度無人問你，主子要你食乜你就食乜㗎啦。」
我：「喳，我今年嘅主子大人。」我向佢行禮。
U：「週末唔要你，留返妳妳妳哋爭飽佢。」
Y：「聽日先有你嘅用處，今日搵返你原來嘅主人。」
豬：「點解聽日先有用呢？其實妳哋喺度玩緊乜？」




Q：「咪咁八啦，不如認真諗下去邊度食好過啦。」
U：「細龜同學，你又有無乜嘢idea咁呢？」
龜：「嗯…我比較想簡單食。」嘩，好高深嘅答案呀。
U：「如果嗌小菜送飯O唔OK？應該都可以一百蚊內。」
龜：「欸…咁會有啲乜小菜？」蒜蓉白菜仔呀！
經過一輪激烈嘅討論，唔知點解最後會變咗去大家樂聚餐…大家其實唔使太認真，學生哥學生妹係咁樣㞗㞗地先可愛，反正攞唔到共識就用一個最hea嘅解決方案。
V：「吓…我都想食大家樂呀…」
Q：「無呀，係時候乖乖返屋企，下次再帶妳去食啦。」