為了實現媽媽遺願，我成為了女兒國唐僧: K656

V：「乜你就真係咁驚Queenie咩？」
我：「唔係驚，係我點返屋企面對佢喎，同佢啲姐妹一齊但就同佢住，我想象唔到會點。」
V：「咁佢其實有男朋友，你又面對到佢？」
我：「三唔識七，見都未見過，理得佢喺出面玩到反轉啦，但如果佢條仔係學校同學我就會頭痛，所以佢千祈唔好接受瘟神…如果有學校以外嘅女仔送上門，我可能會考慮下嘅。」
V：「嗯，唔怪之得要喺街外攬女。」
我：「咪話咗唔係，我只係出於關心我嘅EX…」
返到課室就又係set場嘅時候，打開一大碗咖喱魚蛋就梗係叫所有人盡快趁熱拮嚟食；熱情嘅幽蘭就捉住我陪佢一齊食腸粉…其實我都慣，但俾啲仔望到實就真係…你估我想嘅咩，都唔知點解就算每個女仔態度好唔同，都咁鍾意捉住我嚟陪佢哋，好彩重有Zilvia呢股俗世清流。
由於我哋實在係一班非常有效率嘅小朋友，塊壁報已經完成得七七八八，班女重開始喺度裝飾自己嘅信箱，而唔知點解我個十一號上面就俾人黐咗好多打叉嘅memo紙。
Q：「喂，唔准開嚟睇住呀！」
我：「吓…我自己信箱入面嘅信我唔可以開嚟睇？」




Q：「都未交功課，而家呢一刻重係裝飾嚟，急乜鬼。」
豬：「可能有人幻想緊會係情信嚟呢。」
Q：「想愴佢呀，我封就無可能喇，問下佢嗰封啦。」
Y：「我習慣寫恐嚇信多啲，不過可能佢分唔出邊個寫呢，我哋又無落名嘅。」
我：「睇字跡都分到啦，兩位唔好玩。」
慕：「阿爽，人哋學號就唔記得，但字跡就分到，你都幾另類㗎喎。」
我：「唔關事，抄開功課寫字帖咁，所以一睇就知。」
慕：「點解你成日都可以問佢哋借功課嚟抄嘅呢？」
咁，其實我只係肯定到QQ啲字跡…
Q：「因為我一早就做完擺櫃桶，而呢條友會偷嚟抄…」




Y：「妳咁樣做明顯係縱容緊呢條友嘅懶惰。」
Q：「佢鍾意啦，佢成績又唔關我事嘅，唔好整唔見我啲功課就得。」而事實上Myth坐我後面，應該無乜見過我摷QQ櫃桶，因為我根本唔會咁做，不過是但啦。
V：「搞掂！」書法家終於完成咗佢幅字畫作品。
我：「下面呢啲乜嚟㗎？」其實上面嗰啲我都唔識亦唔需要識，但起碼知道係砌sin cosine。
U：「係你哋M1嘅binomial，poisson同normal distribution嘅式嚟。」
我：「未教到喎，咁妳讀M2妳又會識嘅？」
U：「咁就梗係睇晒M1同M2教啲乜先揀科啱自己㗎啦。」
V：「M1好難攞五星星㗎，有啲年份要九十幾分先攞到，對謹慎程度要求較高，M2就比較睇你識唔識。」