為了實現媽媽遺願，我成為了女兒國唐僧: K654

我：「容許我再講多次，明顯地我係一個正人君子嚟，相信Queenie可以為我嘅人格作證。」
豬：「正淫君子你就有，返去為中一嘅你作證都得。」
Q：「總之妳小心啲啦，有時啲嘢我頂得順但妳未必…」
無論如何，幽蘭開開心心咁捉咗我出去買嘢食。
我：「妳應該喺屋企食埋飯先嚟㗎，又會咁快餓嘅？」
V：「今朝成朝都喺度補習，邊有心機食嘢喎，不過出咗嚟見到你哋咁開心所以就有返胃口。」
我：「明嘅…咁妳有乜嘢想食？我諗唔可以行太遠。」
V：「我想…食屋邨妹平時會食嘅嘢。」
呢個要求，聽落簡單但又似乎好難滿足，屋邨妹會食M記，食學生餐，但應該唔係佢而家想食嘅嘢嚟；呀，既然係咁就不如同佢去嗰度，街市嘅粉麪小食檔。
我：「大小姐，唔知呢度啱唔啱妳心水呢？」




V：「好呀好呀！我好耐都無食過呢啲嘢喇。」
我：「啊，我重以為妳從來都無食過呢啲嘢嘅添。」
V：「又唔會嘅，有時喺機場，某啲展會，或者海洋公園入面會有呢啲懷舊小食檔，貪得意就會買嚟食。」
我諗呢個概念可以理解做喺五星級酒店飲綠寶。
我：「咁…由我決定買乜食啦。」話晒由細到大喺屋邨打滾，邊間污糟邊間乾淨我點會唔知，但街市出品就算更乾淨嗰間都會有一定風險，加上佢應該係公主肚嚟，唔同我呢啲飽歷風霜，經過千錘百煉嘅神仙肚。
V：「好呀，嗱。」佢攞咗張一百蚊紙出嚟畀我。
幾驚會係金牛…安全起見都係嗌啲蒸住嘅嘢，腸粉，燒賣，牛肉球，重要少醬，因為我好肯定枝甜醬入面一定係會有大腸桿菌嘅。
百物騰貴，買幾樣嘢已經三十幾蚊，正當老闆想找錢…
V：「唔使找喇，剩返嗰啲買晒咖哩魚蛋啦。」老闆同我都打咗個突，然後佢攞咗最大個麪兜開始潷魚蛋。
我：「乜原來妳有咁鍾意食咖喱魚蛋㗎？」一蚊一粒魚蛋嘅年代早已不再，家陣十蚊有六粒細已經可以話係超級無敵平，所以六十蚊魚蛋的確係可以食得晒嘅。




V：「唔係呀，我諗住買返去請大家食咋嘛。」咁都好啲，以妳個肚食三十幾粒街市魚蛋好難唔出事。
買完嘢食就開始行返去，幽蘭一路上睇嚟非常心情舒暢，重喺度哼歌仔，就係佢哋諗住夾band嗰首歌。
我：「今日嘅妳睇嚟好開心咁喎。」
V：「係呀，平時嘅星期六唔係補習就係練冰練琴，一係就陪啲大人去應酬，幾可有得咁樣自由自在喎。」其實妳返嚟都練緊書法啫，只不過身邊啲人唔同晒。