為了實現媽媽遺願，我成為了女兒國唐僧: K653

Q：「你十一號學號吖嘛，咪二八一sodium鈉囉，整咗咁耐都唔知自己做緊乜…壁報啲信箱全部空寥寥，咪諗住求祈寫兩封信塞入去做下樣先囉。」
Y：「呀蘇生，咪企咁埋偷睇我哋寫信好唔好？無禮貌。」
我：「咁既然係寫畀我，點解我又唔可以睇？」
Q：「都未寄出，唔好喺度阻頭阻勢騷擾我哋。」
我：「我係蘇啲暗…咁妳兩個又係乜？」
Y：「自己睇塊板啦，而家唔使查書睇電話喇。」
我：「問題係…妳哋學號究竟係幾多號？」
Y：「你真係黐孖筋㗎喎，開咗學咁耐重未記得同學學號都有嘅？話晒你重要成日收功課。」
我：「隻眼睇到，但係唔會入腦嘛，我差唔多連自己學號都唔會記，而且之前又年年唔同…」
Q：「懶得理你，但你個娘娘就基本上每年都係最後個號碼。」叫得YY，當然唔會排得前，除非有人姓Z字頭啫，而Zilvia又唔係真係Z字姓嘅。




我：「我哋班最初三十三人，然後三十四…selenium…石西？係乜嚟㗎？個名咁西嘅？」一般嚟講，為咗方便起見有插班生嘅話就會自動排最尾，但由於幽蘭第二日就過嚟所以佢嘅學號係俾校務處即時攝返喺中間。
Y：「你唔好諗住你主子喺度就保到你條狗命呀下。」
Q：「呢啲兵係妳先會收，認真bad taste。」
得罪啲唔得罪得嘅女仔其實幾好玩，不過得罪完都係要即刻閃人保平安；玩咗一陣幽蘭已經寫完四條式，由最頂寫到去中上，亦都由企喺凳上面變成跪喺枱面寫。
V：「喔，我有啲肚餓添。」睇嚟寫書法好消耗體力下。
U：「呃…無嘢食剩返添，啱啱俾佢清晒。」
健：「Sorry，我重以為你哋個個已經食到飽晒…」
V：「唔緊要啦，茜旎同媱媱可唔可以借隻兵嚟用下呀？」呢個女仔除咗神乎其技之外，有時啲語法都係出人意表，同埋點解又要借我嚟用…
Q：「呢排…今年唔再係我呢個部門負責，妳問佢哋啦。」
Y：「我而家唔需要呢隻嘢住，隨便拖走佢啦。」




U：「喂，妳想捉走佢？咪即係畀機會佢偷懶囉。」
V：「但係…我自己一個人出去，好似有個人保護我會好啲。」有時實在係唔識分佢到底直定曲。
U：「妳講到咁，去啦去啦，唔好俾隻嘢走咗去玩…」
豬：「一放佢落街，又會喺出面攬女㗎喇。」
我：「我講咗好多次係偶遇，同埋有幽蘭喺度我點會…」
慕：「大小姐小心啲，啲保鑣隨時係間諜嚟。」
V：「佢邊敢，唔驚返嚟會俾呢個呢個同呢個問責咩。」
Y：「唔得閒三娘教子，女班長會處決佢㗎喇。」