thriXt Qantasy 純文字安眠之作 (New: - U2K - 一直上架): K652

我：「唔重要呀，溝唔到都唔影響我尊敬女神，佢條仔會好好照顧佢㗎啦，正如我舐唔到妳啲毛都一樣放喺心。」
Y：「妖，變態得你，淫蟲已經唔足以形容你。」
我：「是但啦，唔知妳條仔又舐過未呢？」
Y：「我而家無心情同你隻無毛雞討論呢啲嘢…」
然後我哋聽到課室入面有人拍手掌…
豬：「嘩，果然巧奪天工！犀利犀利！」
慕：「絕對係妙筆生花，小弟實在自愧不如。」
健：「好靚…靚得好交關…」
我哋兩個入返課室，一班仔喺度一副欣賞張大千定齊白石咁嘅嘴面，對住壁報上面嘅sin alpha…讚嘆不已，但係連等號嘅右手邊都重未寫嘅。
U：「唔好玩喇，快啲返去剪嘢，咪阻住人專心寫。」




喺漆黑色嘅紙上面有珍珠閃粉藍嘅英文書法又真係好靚嘅，原來QQ專登出去買顏料係留嚟畀佢咁用。對於呢啲藝術嘢我無乜心情八掛，因為我一早就知幽蘭係外星人嚟，反而Zilvia就企喺佢側邊同佢有講有笑，睇嚟呢兩個女仔一齊打羽毛波之後就熟咗好多。
相對我哋呢邊工廠式咁剪數目字，幽蘭一個人要寫大概六份一塊board嘅公式先係大製作，長期維持住同一個姿勢，寫每一粒字母都要成半分鐘，只要稍一出錯就會影響整個作品嘅完成度，絕對唔係我呢啲凡夫俗子做得嚟。
而QQ同YY兩個就坐喺同一張枱度寫緊啲唔知乜，作為佢哋嘅御前帶刀侍衛當然要睇下佢哋攪乜東東。
我：「寫緊乜…有用㗎？」
Q：「寫信畀阿鈉囉。」
我：「哦，寫信畀阿立…嗯…乜我哋班有人叫阿立㗎咩？」先唔理佢哋做乜無端端寫信，我諗完再諗我哋班都無一條友叫阿立，或者佢哋喺第二度識到仔啦。
Y：「梗係有啦，你個女神好鍾意阿鈉㗎。」
Q：「啋，無啲咁嘅事，係妳先鍾意呢啲過度活躍份子。」
Y：「邊係，全靠妳惡晒dize咗佢，我先借嚟用下。」
Q：「可惜吖，妳爭一個位就係group7，如果唔係就可以同佢永久結合，只溶於水。」




我：「妳哋…可唔可以唔好講外星話，其實邊個係阿立？定係我唔可以知㗎？」
Y：「傻仔，你咪係阿鈉囉。」
我：「我係阿立？做乜無端端幫我改個咁嘅名？」
Q：「低B，自己諗啦，你自己先係外星人呀。」
我係阿立？立字又唔係多交叉嘅…立同爽有乜關係？立即？爽快？好立克？立方？我又唔係姓方。
我：「我諗唔到呀，兩位女神唔好玩我啦。」