thriXt Qantasy 純文字安眠之作 (New: - U2K - 一直上架): K651

至少一定正過嗰隻專攞嚟踢人嘅天王星臭腳。
U：「你哋咪喺度騷擾人啦，一陣寫衰咗就打扁晒你哋…」
V：「應該唔會嘅，唔好行埋嚟就得…」
Q：「我幫你遮住後面先，全部男仔都係變態嚟㗎。」
豬：「呢間課室已經極女權主義㗎喇喎，我哋只係想做返一個正常嘅男學生啫，再者講變態邊個夠你隻兵嚟？」
慕：「我都想咁講。」
Q：「咪亂講，嗰隻兵已經俾人認咗頭，唔關我事。」
Y：「得，咁我帶佢出去避嫌，你哋可以繼續。」然後佢就秤住我個衫袖拉我出走廊。
我：「哎吔，女王豬咪咁暴力啦，到底妳想點呀？」
Y：「喂，邊個准妳咁叫我呀，捉你出嚟係想同你謦嘢啫，入面咁多人咁多對耳仔咪玩啦。」




我：「有乜所謂喎，我又唔介意妳明刀明槍同好姐妹爭仔嘅，我心臟夠強大頂得順。」
Y：「我頂你老…你真係當正自己係男神，QQ都未認你係仔啦，雖然攞你嚟激Myth係幾過癮。」
我：「妳哋班女夠晒惡趣味，其實人哋都幾慘下。」
Y：「有幾慘？佢自己攞嚟嘅，你條PK竟然會可憐佢？」
我：「咁…其實佢都幾靚仔，又高大，身光頸靚咁，唔係好符合妳哋對好仔嘅定義咩？」
Y：「講硬件就係嘅，軟件實在係唔多吸引，佢唔識冧女，又唔識遊戲規則，有排都唔會氹到我哋。」
我：「其實我咪又係乜都唔識，除咗識非禮女仔，不如女王妳教下我，等妳可以名正言順咁同QQ爭仔。」
Y：「食屎啦！咪㧻我肚臍呀，佢哋隨時會出嚟㗎，講正經嘢先，雖然我同各方已經溝通好，但都唔該你聽日好好演出，唔好太過hea，可以嘅話就執靚少少啦。」
我：「知喇，又唔係第一次見，都係嗰啲啦。」
Y：「唉，重有呀，妳女神佢無乜嘢吖嘛？」




我：「佢可以有乜嘢，日日都咁正常㗎啦。」
Y：「我嘅意思係我捉咗你嚟用，佢會唔會有啲乜微言？」
我：「點會喎，幽蘭同天王星咪又係捉咗我嚟玩，佢都慣㗎啦，有時重會叫我溝埋妳哋添。」
Y：「唔同㗎嘛，佢哋重係女仔嚟。」
我：「原來係女人就會危險啲…不如妳直接問佢算啦，妳哋兩個咁老友。」
Y：「就係老友先唔會隨便講呢啲呀，想友情崩壞咩，睇嚟你都唔係好清楚我哋啲女仔係點相處。」
我：「唔係唔知，係我自暴自棄啫，總之可行情況下妳哋有乜難處我都會幫，就算鬧架都一齊氹，但如果關乎QQ絕對利益我就一定係企喺佢嗰邊。」
Y：「你呀，成日黐埋去其他女人度，重要俾其他同學睇到，下世都唔知溝到人哋未。」