為了實現媽媽遺願，我成為了女兒國唐僧: K650

然後佢又睥咗我一下唔出聲，繼續一齊釘埋塊黑紙上去…
U：「釘完塊紙就到呢邊喇，塊板有啲重，小心啲。」
我：「唔係唔想幫妳，但呢塊咁嘅嘢可以點釘上去？」其實我識鑽窿，我識鑲墊片，但唔認為整壁報要咁大陣仗。
V：「放心啦，佢哋知道呢塊嘢要上壁報，所以喺個背脊度銲咗幾排釘㗎喇，你哋諗辦法㩒入去就得。」
我揭起望一望，原來呢塊嘢真係成品嚟…而且啲釘腳位重好小心咁用膠塞套住，後面重畫埋箭嘴顯示向天方向，但我心諗一塊正方形板又有乜方向可言呢？觀察咗十幾秒之後，先發覺個底啲釘腳係加多咗墊片，令到釘上去係有輕微嘅斜度，減少反落嚟嘅風險…
幾經辛苦終於準確無誤咁壓咗塊板入去，肥豬同細龜就即時黐啲磁貼上去玩，玩玩下先醒覺其實啲磁貼整做白底方形都無乜問題啫，點解係要雕粒數目字出嚟？呢個女班長真係，可以靚得幾多喎…
整完呢邊又到另外一邊，班女啱啱定完稿同度尺，QQ同思韻喺度幫幽蘭磨墨，而幽蘭就攞住一大枝平尖筆用水喺啲廢紙上面練字；男班長喺側邊一路望住，我想講你唔使望門輕嘆喇，因為你連門都沒有。
無門幾好呀，係啲粗言穢語嘅俗人先會成口門字部。
V：「第一行係咪sin alpha加beta呀？」
U：「係呀，一定啱，絕對唔會錯。」妳哋到底諗乜…




V：「嗯，我要諗下alpha同beta點寫先，唔係正規英文字母無書法體可以參考。」
只見佢拎住枝筆揮下揮下，心中有筆手中亦有筆。
V：「你哋做乜全部人都停晒手喺度望住我…」
豬：「放個小息，等睇大師表演。」
V：「吓…唔好咁啦，我會好大壓力㗎。」
Q：「唔好理班無聊人啦，妳玩比賽嗰陣咪又係咁。」
V：「咁又係，是但啦，等我擔張凳過嚟先。」佢除咗對鞋企埋上去，開始調整手勢就位。
今日嘅佢上半身著住一件無可奈何嘅社T，下半身係一條黑白色漸變及膝裙，再加一對OL中踭鞋，所以係無著襪赤裸裸嘅腳仔企咗上張凳度，當然對我嚟講係濕濕碎。
U：「喂！你班友係喺度睇人寫字定乜嘢㗎？！」
豬：「好明顯，我個角度係望緊上天花板！」做男仔嘅一定會明，明明眼球係望住前面個方向，但啲視神經就用晒嚟對焦同分析眼白望到嗰啲矇查查嘅影象。




Sor，其實眼白係睇唔到嘢，側邊嗰啲係超折射入瞳孔嘅成象。
Z：「欸…你哋…唔准偷走我張凳㗎。」少見地Zilvia會講呢啲嘢，佢好似都覺得幽蘭隻腳係十分之正。