係同屋失友？定係同居勿友？只想同妳做普通朋友…🤦🏻‍♂️: K649

J：「幽蘭，妳諗住寫咗先釘定釘咗先寫呀？」
V：「嗯，釘咗先啦，張紙太大打平寫都唔係太方便，反而釘上去當寫黑板咁樣重好。」
U：「好，咁你兩個高嘅負責釘咗張紙先，千祈唔好整皺，記住要貼實塊板，你哋唔好八掛繼續剪數目字。」呢個女班長…做肉類批發生意都係唔太啱妳，不如準備做工地女工程師啦，到時大把男人任妳舞。
慕：「釘入啲啦，太出唔好受力㗎。」
我：「我驚釘得太入隻角會翹起啫。」
慕：「入少少啫，未至於，張紙裂開會大鑊好多。」
我：「估唔到你都會咁珍惜張紙喎，又唔係你寫。」
慕：「真係貴嘛，可以就盡量整靚少少啦。」
我：「哦，咁張紙其實要幾錢？」
慕：「唔太知，不過一張呢啲紙隨時夠你買一塊pizza。」




我：「吓，使唔使呀，唔通係洛陽出嘅？」
慕：「特殊用途嘅美術用紙唔平㗎，家陣就算一張普通靚嘅底紙都十幾蚊啦，但最大問題唔係價錢，而係你有錢都未必買得到，好少人買，啲鋪唔敢入，又唔知邊間有…」
我：「哦，我會好小心，放心。」
學天王星話齋，雖然我唔多鍾意Myth，但一樣可以和平合作咁做嘢，佢㩒實張紙我就負責落釘。
慕：「其實女班長知唔知道你嗰陣讓佢？」
我：「吓，我無讓佢呀，已經全力已赴，贏唔到咪輸…」
慕：「你玩玩下都無心贏，讓咗心態已經係讓。」
我：「你可以咁講嘅，但贏輸對我嚟講都係無謂，贏咗又唔係有奬金，輸咗都係幫佢做下嘢啫。」
慕：「哼，我實出盡全力，唔可以再俾佢得戚落去。」
我：「咁…祝你旗開得勝，勢如破竹，馬到功成…」




慕：「吹啦你，你咪又係幫住佢。」
我：「無啲咁嘅事，雖然我同佢係相處到，但係佢同其他人啲是非我係絕對唔會理…其實，就算你贏咗，都只不過係換嚟一句道歉咁大把啫。」
慕：「咁就夠，起碼以後唔使咁睇佢面色。」
我：「真係唔現實，你話如果輸咗要以身相許就話啫。」
慕：「呢啲女人你要埋佢，一副臭脾氣嘥晒個殼。」
我：「我何德何能，所以我諗都唔使諗。」
Myth斜眼睥咗一下天王星，然後又嘆咗口氣。
慕：「重以為好似我呢啲咁嘅男仔，溝女應該唔會太難。」唔太難…但趕走女仔往往係更加容易得多。
我：「嗱，我無阻住你㗎…全班啲靚女都差唔多喺晒度，我又攬唔到佢哋嘅，我攬屋邨妹咋嘛。」我今次真真真無講大話，因為QQ真係屋邨妹嚟。