係同屋失友?定係同居勿友?只想同妳做普通朋友…🤦🏻♂️: K648
但,只有佢自己先知道佢係我嘅手下敗將,重網開一面放過咗佢寶貴嘅貞操,妳都係多謝QQ吧啦,如果唔係…
食完晏飯,我哋幾條仔又變返集中營入面啲女工咁不停剪數目字,而班女就重喺度商討點修飾塊元素表,其實都係交功課啫,使唔使咁認真喎,明明一開始就無人想主動整,但呢班女一開始咗就好似會停不下來咁。等咗陣健仔亦都啱啱嚟到,個頭重係濕嘅,應該係啱啱沖完涼嚟,啱嘅,如果佢踢完波敢直接鏟上嚟班女實會踢佢出呢間課室,留返把鉸剪同啲材料等佢喺出面處理。
健:「咦,重有嘢食剩返呀?」
我:「嗯,重有三塊pizza。」呢樣食物,永遠係你睇嗰陣就想食好多,但食完一塊之後就唔多想再攞第二塊。
健:「有無人要㗎,我可唔可以攞嚟食?」
我:「想食就食啦,都攤到凍晒…放心呢度唔會有人收返你錢嘅。」要收佢哋應該收班會費先,剩係電腦鎅字都唔平,重有啲磁貼,幽蘭所謂啲免費物資…
健:「咁我唔客氣喇。」睇佢食pizza實在十分之有青春期少男嘅氣息,話咁快就已經食到第三塊。
我:「有無咁肚餓呀,頭先返屋企無食嘢咩?」
健:「今朝跑咗成朝,返到屋企得啲菜同飯…」呢種感覺我明呀,所以以前我成日都會喺便利店黐飲黐食。
V:「對唔住呀!大家,我終於嚟到喇!」
U:「嘩,好大塊!辛苦晒妳搬過嚟。」幽蘭用手臂夾住一大個正方形紙盒,類似人哋載畫嗰啲盒。
V:「唔辛苦,我其實都係喺學校門口搬上嚟咋嘛。」講辛苦應該係幫佢準備打點嗰堆人。
U:「好!開嚟睇下先!」佢攞咗一大塊嘢出嚟,再分開兩嚿嘢,一塊硬磞磞,另一塊就好似個folder咁…
Y:「嘩…想要塊黐到磁貼嘅板啫,佢哋好似已經整埋成品咁。」係一塊白板,類似先生教書嗰啲,亦可以黐到磁貼,睇到四隻角已經磨圓咗,條邊封咗膠貼,上面重用黑色嘅幼膠紙劃咗九九八十一個格仔出嚟,就算唔使度都知道連直角戰士都會收貨。
J:「噢,咁我哋卷黑色膠紙可以慳返嚕。」
Y:「好事嚟吖,長到咁好難貼得靚㗎。」
豬:「喂…咁點解唔一早叫佢哋剪埋啲數目字呀?」
U:「咁你不如一早出錢搵出面公司整,唔好咁懶啦!」
慕:「Anyway,我覺得呢塊嘢如果要買都值四位數…」
V:「唔知呀…佢哋話喺公司現成搵材料,然後啲同事輪流得閒整,然後就完成咗喇,反而嗰張紙就要買。」
豬:「呢張紙有乜特別要勞煩妳搵人去買?」
V:「無呀,咪就係一張特別黑嘅紙,咁我喺上面用淺色筆寫嘢就會特別靚,平時文具鋪嗰啲太灰色…」佢抽咗一隻角出嚟,張紙真係黑碳咁嘅色,唔通嚟自非洲嘅?!