為了實現媽媽遺願，我成為了女兒國唐僧: K647

慕：「話咁快就一年，上年見到啲人喺學校門口攬女，今年又可以見返，好似無乜點變過咁。」呢句明顯地係為咗挑釁我，或者想離間我同啲女神們嘅感情，因為佢應該一直都唔妥我點解無所事事又可以成日圍住佢哋轉。
佢啲語氣讕係平和，又帶半分玩味嘅微笑，扮到友好咁似乎係表揚我喺溝女方面嘅獨特成就，實質想插我一刀。
你估我想嘅咩，一開始QQ就唔係我目標，好多嘢我都係身不由己，只係亂打亂撞變成而家呢個局面。
我：「嗯，重係同一個女仔嚟，大家個樣都無乜點變，不過上年攬住佢覺得好威威，而家只係想鼓勵下佢。」呢度點都係我主場多過佢主場，如實講出嚟無乜問題。
Y：「好似成熟咗好多咁噃，定係喺度扮嘢？」
慕：「既然成熟咗，可以舊情復熾再拍多次拖。」
我：「唔會住喇，都係做返朋友開心啲。」
慕：「真係羨慕你，一邊攬住人哋一邊話做朋友就夠。」
我：「係事實嚟，佢係普通屋邨妹嚟啫，如果班長你想識嘅話相信多多都有，易溝過啲女神好多。」
慕：「莫講話女神，普通女仔都唔識多個，邊似得你每一日都左右逢源咁開心。」然後又望下我左右兩邊。




我：「都係咁啫，你而家都唔差吖。」
Myth望一望天王星，然後又輕聲嘆氣。
Q：「你兩個成日面阻阻咁有乜謂呢？」
Y：「妳又唔係唔知重明知故問，佢哋而家敵對緊。」
U：「無啲咁嘅事，我哋一直好和平咁分擔班長職務。」
慕：「我想講，其實妳唔一定要參加音樂日嘅，無玩開要上手係比較難同嘥時間，驚阻到妳同啲姐妹讀書啫。」
U：「唔會呀，得閒玩下，平衡下校園生活都係一件好事嚟，不過我唔會學似啲人顧住玩連會都唔開，更加唔會俾呢啲興趣活動影響到學業。」
慕：「我知妳諗住一定要贏，如果輸咗對大家都唔係好事嚟，我哋係enjoy個過程，輸贏反而係其次。」
U：「放心，我哋都一定會好enjoy，兼且盡全力攞奬。」
J：「班長，你對住班女神都係束手無策㗎喇，好好備戰好過啦，你未必有阿爽輸得咁難睇嘅本錢。」




我：「係囉，我晨早就話投降，係要蝦到我體無完膚。」
U：「細龜，啲薯蓉有多呀，整返個啦。」
龜：「我…真係飽呀，我從來都食唔晒一桶雞嘅。」
U：「唔准唔食呀，食咁少嘢會生唔得高大㗎，佢哋個個都咁大份，咁樣你會俾佢哋蝦㗎。」
龜：「咁…好啦。」其實細龜一啲都唔算細粒，充其量都叫正常，只係佢嘅宅男性格影響到其他人對佢嘅觀感，加埋我哋在座嘅幾條仔同佢又真係有對比。
至於天王星…佢係女中赤兔嚟，大部份仔喺佢身邊都算細粒㗎啦，就連高大過佢嘅男班長都制服唔到佢…