係同屋失友?定係同居勿友?只想同妳做普通朋友…🤦🏻♂️: K646
我再望下班女,全部都喺度裝飾緊塊元素表,標題就有喇,每一粒元素隔籬再黐啲類似emoji咁嘅公仔,例如氦隔籬就有氫氣球,Au嘅下面就係金條,而周圍重有啲類似molecule咁嘅圖案;雖然呢班女唔係美工出身,但對於靚呢樣嘢仍然係有一絲不苟嘅心態。
好彩我死都選擇瞓多陣,咁就可以整少幾粒。
見佢哋咁認真,我都幫佢哋攤開晒啲食物出嚟先。
我:「食嘢先啦,我運咗好耐,就快凍㗎喇。」
成班女連埋男班長出咗去洗手,細龜同肥豬就一人攞一盒燒臘飯坐埋一邊食住先。
我:「原來呢兩盒嘢係你哋自私食嘅。」
豬:「乜自私喎,費事迫住佢哋,一陣又話我食得多…」
我:「唔會啦,佢哋鬼得閒計埋呢啲婆仔數,不過你食得幾多喎,得一盒飯你夠㗎嗱?」
豬:「夠啦,減肥呀。」然後細龜就靜雞雞潷咗兩羹飯畀佢,呢兩隻嘢都幾得意…
然後一班女返嚟,易汪同QQ同我打咗個眼色行埋一邊。
Y:「呢袋嘢畀你嘅,記住聽日乖乖哋同我著咗佢。」
我:「係乜嚟㗎?」我望住QQ問。
Q:「唔知喎,佢先係你嘅娘娘,唔關我事。」
Y:「返到屋企先好打開,到時你咪知囉。」係一個好大嘅紙袋,上面用膠紙封死咗睇唔到入面。
跟手就排排坐圍住四張學生枱食嘢,我好機智咁砌到佢卍字形咁,中間有個㝫仔放個大批喺度就啱啱好遮住。可能由於同性相斥嘅關係,我同男班長自然打對面坐,YY同QQ唔知玩嘢定係點坐我一左一右,Myth側邊就係思韻同埋天王星。唔知點解覺得呢種課室開餐嘅setting好趣緻…
U:「主席你哋坐到咁遠做乜?好歹你都係班代表嚟,咪喺度自閉啦好唔好?」
豬:「我從來就無話過想做主席,只係嚟幫下手㗎咋。」
U:「過嚟幫手食啲吖,我哋嗌多咗㗎。」
豬:「唔使啦,我已經食飽咗。」佢講呢句嘢嘅時候手上面盒飯已俾佢清光咗,對一個高中男生嚟講,一盒飯唔可以生存多過五分鐘係常識吧。
U:「欸,你咪扮嘢喎,我記得你上年可以一個人食晒成桶三人餐嘅雞。」
豬:「上年還上年,今年還今年,我唔會再咁樣浪費食物…」欸,我唔知佢真係想減肥定係想環保,不過青春期嘅少男偶爾就係會有呢啲奇怪嘅舉動,所以見慣不怪啦,又或者佢真係想瘦啲方便自己溝女。
U:「咪咁刁僑扭擰呀,上年食一桶,你今年起碼都食一隻啦,你食咁少嘢我會心理唔平衡。」喺女班長嘅威迫利誘之下,佢終於屈服同細龜行咗埋嚟接收件雞。