係同屋失友？定係同居勿友？只想同妳做普通朋友…🤦🏻‍♂️: K642

好彩得到天王星嘅撥亂反正，我哋先唔使再喺度聽班女講鹹濕嘢，我又明嘅，天王星你仔都未掂過又點插到嘴喎，除咗妳成日打我之外…阿健你又一面無奈咁望住我做乜？你可是經常性可以攬住個姐姐做啲大人先做得嘅事情，而且人哋重已經好體貼咁做足安全措施，等你每一滴日月精華都唔使浪費…而我呢？到底我有乜？！
人多好辦事，欸…其實唔係，因為我哋顧住謦欬，足足粒半鐘有多先黐晒百幾柒粒元素上牆，平均一分鐘先黐到一點幾粒；不過主因唔係黐上去難，而係要落六條雙面膠紙好嘥時間，而天王星又話一條都不能少。
食晒妳哋六條女就話一條都不能少啫，啲盒邊有咁易跌落嚟呀，落兩條都已經實淨過某國啲豆腐渣工程啦，大家話啱唔啱先？不過諗返轉頭，呢度啲女應該係得Q同Y食得啫，其他諗都唔敢諗，J又唔係咁熟…
Q：「攪掂，以後上堂唔使再摷元素表嚟睇。」
Y：「又真係幾靚喎，雖然意義上唔係幾課室壁報。」
J：「如果讀文科…係咪就要整中國地圖？」
我：「直頭要整清明上河圖啦！咁而家攪掂咗個周期表，我哋聽日係咪唔使返嚟整喇？」
U：「梗係唔得啦！重有好多嘢要加㗎。」
我：「有乜呀？咪爭個標題咋嘛，星期一先返嚟整埋唔得咩，聽日假期嚟㗎，後日又話要乜乜乜…」無錯，因為團長已經約咗佢哋星期日去首練，而唔知點解我又要去。
U：「乜標題呀！你見唔到左右兩邊係吉嘅咩？」




我：「元素以外，就係簡單極致嘅虛空同埋混沌！」
Y：「算吧啦你，人哋好心等你同佢可以見多日咋。」
Q：「乜呀，人哋隻兵星期日俾妳搶咗，咪諗住霸返日星期六囉，關我鬼事。」
Y：「鬼叫妳練兵無方，打輸咗比個女仔，養兵千日喎…」
U：「咪嘈呀！總之…聽日當係班會活動，個個都要返嚟幫手。」呢個女班長…有本事妳就捉雅如返嚟整壁報。
我：「班會活動…一個剩係得主席嘅班會…」
U：「我理得佢，總之佢都實會預埋你一份。」
我：「真係諗唔明，呢啲事務到底關我乜事。」
J：「鬼叫你係班主任嘅科長，簡單嚟講你就係秘書，比起班會主席同班長更加大，負責監工，無得偷懶㗎喇。」
屌，咁我係咪要管理埋Miss教嘅其他班先？




我：「知喇，預我聽日中午前返啦…如果無乜事嘅話，我哋兩個就先行告退喇。」太多人好麻煩，就算我同啲靚女好熟都要左就右就唔好玩，返去等QQ好過。
由於做完啲建設性嘅事務，我哋就多個理由去吸收返啲卡路里，走咗去車仔麪鋪嗌個剩三餸；本來咁樣嗌好貴，但老板娘好好人當係學生餐走麪咁賣畀我哋就算重平五蚊。
我：「畀心機啦，而家識搵錢同人哋去玩嘞…」
健：「呢樣嘢你都做咗成年啦，唔算得上係啲乜。」