係同屋失友？定係同居勿友？只想同妳做普通朋友…🤦🏻‍♂️: K641

Y：「啱嘞，呢條友而家無用，女班長妳可以差遣返佢先。」妳哋對我呼之則來，揮之則去無問題呀，但小弟我係唔識分身，更加唔識讀心術可以知道妳哋班女想點。
U：「妳哋兩個…喺度阻住佢做課後，我又點差遣佢呀？！唔好玩住先，快啲嚟幫手呀！」
健：「咁我去黐咗個hydrogen上去先…」
呢幾條女，唔熟嗰陣得個睇字，到而家熟得滯就會有啲頭痛。做完課後，我就即刻落去交貨先，點知今日敲咗兩次門又無人應我，同一個數學sir又頂唔順叫我入去…睇嚟Miss佢為咗趕住去拍拖就連叫咗我留堂做功課畀佢都唔記得，點知我行到去佢條走廊嗰陣就見佢係咁㩒電話。
愛情使人瘋狂，阿健如是，Miss亦如是。
我：「鄧老師，色字頭上一把刀呀。」我飄到去佢背後…
鄧：「嘩！你嚇鬼呀，做乜唔出聲，成隻幽靈咁。」
我：「頭先叫咗妳兩次喇，妳聽唔到咋嘛…呢度係妳要嘅課後，阻住妳放學會佳人，實在十分對唔住。」
鄧：「無阻呀，佢都未放學，你放低啦。」
我：「Miss，張sir佢好green㗎咋，妳唔好嚇親人呀。」




鄧：「唔關你事呀！快啲上返去繼續整你嘅壁報！」
唓，打完和尚就唔要齋都有嘅，如果唔係我你哋兩個而家又邊有得…雖然都係因為我你哋先會出事；總之，妳而家就係有異性無人性，恩將仇報！
上返去就繼續貼盒，由於一早已經度好晒位嘅關係，我同阿健喺左邊黐，班女就喺右邊黐，貼到去中間有時會揩到嘅，除咗思韻外都無乜特別；呢排同YY嘅距離近咗少少，同佢講嘢方便咗啲啲，唔知QQ會唔會有乜諗法呢…但其實我每個星期都會同幽蘭天王星玩㗎啦，咪又係咁。
但唔同，YY淫咁多，QQ肯定會顧忌多啲。
U：「死仔包停手呀！你粒係randon嚟！唔係radium！睇號碼啦！你敢貼錯我就閹咗你等你無女溫！」
Q：「閹啦閹啦，咁我哋可以多個姐妹。」
Y：「或者妳可以中途轉基多個女朋友，咁就男女朋友各一儲齊一套。」
Q：「衰婆，對佢無興趣，係都食咗妳先。」
U：「唉，而家啲細路女真係，睇到都眼冤。」
J：「直頭係，曳呀！女大不中留。」




Y：「唔知呢度係邊個最早拍拖，中一就去咗食仔呢？」
J：「無食囉，好純㗎嗰陣，佢日日都想除我件衫就已經飛咗佢…」咁我唔除衫，剩係攝隻手，或者除裙可以嗎？
Y：「咁而家呢，男朋友除到妳件衫未呢？」
Q：「可能未，因為想郁手前佢自己已經除咗先。」
U：「做嘢呀！咪剩係顧住喺度講！」