係同屋失友？定係同居勿友？只想同妳做普通朋友…🤦🏻‍♂️: K640

健：「邊係呢…先唔會學佢喺對面馬路攬女。」
Y：「係唔會學佢，定係無機會學佢咋？」真夠殘忍…
健：「機會…又未必無嘅，或者可以爭取下。」
J：「總之，恭喜你啦，祝你早日脫單。」
Y：「記住呀，做壞事嗰陣要做足安全措施。」
健：「吓…呢個…」雖然佢哋係咁咁咁，但措施嘅嘢欣姐一早已經做足晒，所以唔輪到呢條友嚟擔心。
Y：「睇下你吖，小小嘢已經面紅到咁，點樣溝女呀，唔使咁驚喎，Zilvia同Vienna又唔喺度。」
U：「喂！妳哋幾隻嘢當我係乜呀！」
Y：「點同，妳又唔係小妹妹，妳係百毒不侵。」
U：「乜意思呀，我先無妳哋咁曳，個個都人細鬼大。」




Y：「先唔係呀，唔好亂講，我哋從來都無認過，所以重係好清純嘅。」
U：「乜無認過？妳起碼講過妳會用手。」
Y：「法律無寫過用手唔得喎，呢啲唔計數嘅，不過而家係妳自己講咋，一早就話妳百毒不侵。」
我：「幾位靚女，妳哋…攪到我血脈沸騰咁，係會令我寫極都寫唔完最後一題㗎。」
Q：「重好講，呢度最曳就係你，起碼我哋無喺學校對面攬仔。」計唔計埋我屋企先？
J：「我想講…我知你哋話佢琴日攬嗰個係邊個，但其實我係鍾意嗰個姐姐多啲，都係同一間學校嘅。」
Q：「估唔到你咁耐以前已經有留意呢隻嘢。」
J：「無呀，佢咁大膽又咁曳咪八掛下，小心提防嘛。」
我：「哎吔，我咪講咗係偶遇，只係懷緬下…並唔係我想攬就隨時有得攬，更加唔輪到我任揀，我而家只係一個潔身自愛嘅單身小毒毒，好慘㗎，連佢都不如。」
Q：「娘娘，妳隻兵投訴呀，派下兵糧畀人啦。」




Y：「係派都妳派先啦，不枉佢跟咗妳咁耐。」
Q：「哦，好笑，我唔收兵㗎喎，係佢自己犯賤黐埋嚟，又點會派兵糧畀佢呢，不過既然妳要徵用佢，在情在理都應該要付出下呀，妳話啱唔啱先？」
Y：「啊，要我攬下佢又無乜所謂呀，算得上啲乜吖，我又唔會覺得對唔住條仔嘅，不過呢，我就比較擔心會令某人唔開心多啲嘞，我諗佢都唔敢冒險激嬲人哋嚟攬我。」
J：「其實我可唔可以知道…你哋喺度玩緊乜呢？」
Q：「嗯…己所不欲，勁施於人咁囉。」