為了實現媽媽遺願，我成為了女兒國唐僧: K639

健：「唔係呀，我指做緊嘢嗰陣呀。」
我：「做嘢…咪還做嘢囉，唔好打爛嘢，你問嚟做乜？」
健：「其實，係阿欣介紹咗份嘢畀我做，今個星期日第一次返，所以咪問下有工作經驗嘅你。」
我：「吓…佢做乜無端端要你返工，賣你去舊金山呀？」
健：「唔係…佢話男仔要有收入先有資格溝女，所以咪幫下我咁囉。」呢個邏輯咁似賊喊捉賊咁嘅？
道理我明嘅，的確男仔要使得起少少錢先可以有say，否則港女實在係太惡…當時我都係有咗少少收入先覺得自己有資格助養QQ，可惜佢搵錢嘅效率實在係太高，而且而家重有埋幽蘭…不過我都係要繼續返工。
我：「咁你係返乜呀？合法㗎…」
健：「你當佢係乜嘢人呀，酒店炒散啫。」
我：「其實有乜做㗎，去清理人哋開完房啲災場呀？記住唔好玩啲用過嘅dom嘅外面同埋床下底嘅性感底褲。」
健：「你諗咗去邊呀，去幫手周日早午餐個自助餐場，所以先嚟問下你。」




我：「阿欣叫你做，點解你唔直接問佢？」
健：「我有呀，佢話聽大佬講就得，非常簡單。」
我：「都係差唔多咁啦，佢之前有做過？」
健：「有呀，如果唔係點介紹我去做。」
我：「哦，原來佢做過酒店妹。」
健：「點解你無論講啲乜都可以咁衰衰格格嘅…」
我：「講笑啫，做飲食場來來去去都係嗰幾味㗎啦，你唔怕污糟同辛苦就得，係呢，有幾多人工咁呀？」
健：「六十五蚊粒鐘囉，話畀多咗五蚊㗎喇，遲啲如果做熟咗可以有七十蚊。」
我：「都算係咁啦，總好過企M記連五十蚊都無。」
健：「我都覺，十點做到三點就有成四百蚊，而且重包一餐，雖然係人哋食剩嘅嘢，都好過食M記嘅，不過就要放咗工先有得食…」唔通諗住有得同啲客一齊食咩…




U：「兩個做乜咁好謦呀？想阻住佢做課後呀？」
健：「唔係呀，條友都係抄咋嘛，又唔使用腦嘅。」
我：「乜呀，我有改㗎！同埋最後一題喇，好快好快！」
Y：「喂，健仔，你呢排做乜成日喺度笑吟吟，溝到女呀？」呢個女仔真係特別鍾意攪風攪雨。
健：「這個嘛，點講好呢…」
Y：「吓，有乜唔知點講，是非題咋喎，yes or no，唔係咁都怕醜呀？雖然睇你個樣都知係A0。」
健：「的確…係識到個女仔…係出面嘅，但…唔可以話溝到囉，只係相處緊咁。」
Q：「犀利喎，學埋呢條友喺出面搵食，果然係好朋友嚟。」論賊喊捉賊，QQ果然係無出其右，而因為易汪唔係太清楚QQ同我住之外嘅嘢，所以無變樣。