係同屋失友？定係同居勿友？只想同妳做普通朋友…🤦🏻‍♂️: K637

Y：「幽蘭呀，係咪因為團長唔揀妳所以就懷恨在心呢？」
V：「嗯…又唔會嘅，其實我明明哋佢諗乜嘅。」
Q：「唔知會唔會係因為有人長期有得睇無得食而心理不平衡呢，其實團長都唔係好靚仔啫。」
Y：「我使唔平衡？我同男朋友都不知幾好。」
V：「團長呢…我覺得佢差唔多靚仔到就算俾佢呃咗都唔會嬲嗰隻，可能啦。」我夠話妳哋是但一個姦我都唔會反抗啦，好彩我唔係女仔，如果唔係我驚會係咁撩仔扑嘢。
Q：「唉，妳咁諗就實無㗎喇，好快大個女。」
我：「欸…妳哋會唔會覺得喺我側邊討論埋啲咁嘅嘢係會有傷風化嘅呢，畢竟幾位都係高尚嘅女學生嚟。」
Y：「嘖，你哋男仔講靚女就得，我哋唔可以講仔嘅？」
我：「又唔係唔得嘅，係怕妳會污染到左右隔籬啫。」
阿健同細龜聽到我咁講一齊擰埋個頭過嚟，一個喺度同某女人狂chat，另一個就上緊乃木坂官網；當我無講過算…坐咗咁耐隔籬位，其實佢兩個都開始俾啲女神馴化，反正女神們唔會諗住喺佢哋身上面得到乜，而佢哋又唔會膽敢高攀女神嘅。




Q：「自己唔夠靚仔就唔抵得人，實在係可悲呀。」
V：「係囉，如果你靚仔啲我都會開心㗎，話晒讀咗咁多年書第一次坐喺男同學隔籬。」乜都係我錯…
周圍都係敵人，我又望下後面…男班長坐到成個碇源堂咁款我諗佢都唔係太好受，話晒佢都係半個男神卻落得如斯下場，就只怪呢附近啲女戰鬥力太高。
既然返得學，少不免嘅自然有中文堂；呀sorry，係含春嘅中文堂至啱，女人有時真係好恐怖…
鄧：「阿親愛嘅科長，請問你成個朝早做咗啲乜呢，點解到而家都重未收課後㗎？」
我：「咪…就係我成個朝早都養精蓄銳囉，咁我而家收啦，麻煩咁多位同…乜話？課後？」我眼仔轆轆望住佢。
鄧：「阿科長，你咁嘅樣即係想同我講未做嘅啫，你都好大嘅膽呀下，已經畀咗成個禮拜時間你哋做。」咪就係因為太多時間，我早就已經忘記得寸草不生…再加上琴日啲時間同精力用晒喺唔知邊個女人身上度呢？
QQ伸一伸脷，佢擺明係唔記得幫我對功課。
我：「對唔住，我會盡快做返交畀妳。」
鄧：「負責收功課嘅唔記得做功課，係咪罪加一等先？」




我：「小人知罪，罪該萬死…」
鄧：「離晒大譜，你留堂同我做好佢今日之內交。」
我：「今日本身就要留堂，我要幫手整壁報。」
鄧：「啊可，咁呀，罰過第二樣囉，罰企好唔好？定係女班長會唔會有啲乜嘢提議，聽聞你呢排好聽女班長話…」
U：「妳講乜佢都唔鬼記得，呢條友太無耳性喇，就罰佢企兼夾扭耳仔啦。」乜話？乜咁攪法呀！