為了實現媽媽遺願，我成為了女兒國唐僧: K635

妹：「哈！多謝，如果唔係我要結婚，就唔會攪咗咁多事出嚟，差啲破壞埋佢哋嘅好事。」
我：「未必㗎咋，以佢哋兩個咁樣，就算無事無幹都可以無疾而終，可能而家更加好呢，就好似乜失翁失馬咁…」
Q：「係塞翁失馬，焉知非福呀！不過而家先係開始啫，將來嘅嘢唔會有人知。」
妹：「將來係點唔係咁重要啫，佢兩個都係好人嚟，咪畀個機會佢哋試下囉，總好過原地踏步，正所謂路係由人行出嚟㗎嘛。」
Q：「嗯，祝佢哋好運啦，係嘞，姐姐妳好似好後生咋喎，又會咁快決定結婚嘅？」
妹：「嘻，係呀，我唔係大你哋好多㗎咋，今年先啱啱畢業，出嚟做嘢一年都未夠。」屈指一算…差七年咋喎。
Q：「咁早就結婚，唔會覺得有啲…唔係幾好咩？」
妹：「都會㗎，明明重大把青春可以等我慢慢搣，不過唔到我揀呢…我先生係我公司上司，外國人嚟，我year 2同year 3 intern都係去跟佢，嗰陣佢同女朋友long d緊，我哋雖然行得埋都只限於曖昧，每次intern完咗我哋就無繼續聯絡，直到今年畢業我搵佢睇下幫唔幫到我搵工，佢好快就安排咗另一個部門嘅職位畀我，雖然唔係一齊做嘢，但咁樣令我哋嘅關係就變得更加好，而且佢同ex已經散咗一段時間，正當一切發展得好順利嘅時候，公司突然宣佈話要cut好幾條大team…可能你哋都知而家香港乜嘢景㗎啦，所以佢就被召返去美國老家…我哋明知道long d係一個唔可行嘅方案，而我只係啱啱過probation無可能咁快申請到去外國做嘢，咁剩返嘅可能性，一係結束一係就結婚我跟埋佢過去，佢上個月已經返咗去喇，所以咪要阿哥幫我手打點囉，咁啱就俾你哋撞到。」
Q：「原來係咁，祝你幸福…不過趕成咁妳肯定清楚佢為人未㗎？」呢啲小妹妹真係現實到…
妹：「還好啦，有個女學生送上門都可以唔食，衰極有個譜嘅，所以…唔諗嚕，反正有啲厭倦香港啲仔。」




Q：「都明白嘅…妳而家喺邊度返工呀？」
妹：「羅兵咸永道…唔好講我喇，你哋係情侶？」
我：「唔係，佢一早就有男朋友邊輪到我，係同學啫。」
Q：「我哋係好朋友嚟。」
我：「乜唔係普通朋友嚟咩，做乜無端端升咗級㗎？」
妹：「哈，你兩個真係好得意…好令人懷念呢，中學生嘅生活，雖然對我嚟講都只不過係幾年前，有時真係會覺得好朋友永遠比男朋友優勝…」
然後我哋繼續完成埋我哋嘅晚餐，講下我哋嘅校園生活，佢又八下我哋個Miss平時教書係點樣。原來佢阿哥大佢五年，而佢喺好細個嘅時候爹地就已經離開咗，母親一直含辛茹苦照顧佢兩個，阿哥就負責幫手湊細妹，但咁樣無令到佢更加容易識到女仔，反而因為全世界嘅女仔都唔會好似細妹咁對佢，而令到佢唔識點開始。