thriXt Qantasy 純文字安眠之作 (New: - U2K - 一直上架): K634

先唔去思考佢啱啱呢句算唔算係表白，但就連手仔都唔掂一下究竟係想點呢？最正係我哋望下呢個又望下嗰個，十足十啲遊客欣賞石像咁嘅情景。
妹：「得，你兩個就一直咁樣唔好郁啦。」
當佢講完呢一句，唔知點解我哋三個人心有靈犀咁，QQ同阿妹就將阿哥推前，而我就負責捉實Miss嘅膊頭固定佢；張sir隻腳死都唔肯郁，變成個身撲向前面。
鄧，張：「嘩…呀…喂…嗯。」先係男方失去平衡被迫捉實Miss手臂，繼而我哋再推前兩尊石像，包括對返啱個頭嘅方向，佢哋嘅嘴仔終於掂到喇！
鄧：「我作死你呀！又喺度玩Miss！」好快佢就扶返住阿sir縮開個嘴，然後即刻對我破口大罵。
我：「乜玩妳喎，我擺明就喺度拯救緊妳啦…」
鄧：「咁都唔可以咁㗎…」今次有人封住咗佢把口等我耳根清靜，阿sir攬返住佢一嘢嘴埋去…佢好似想濕吻但係又唔多識，攪咗陣Miss忍唔住啜返住佢。
我哋觀察咗五秒左右，雖然佢哋惜得起勁但就唔敢掙開眼…係嘅，兩位先生喺個人來人往嘅地鐵站出口舌戰實在係成何體統喎，實在係教壞晒我同QQ，唉…
妹：「認真眼冤，我哋走喇。」佢向我哋示意跟佢一齊行，留低對情慾高漲嘅狗男女喺度繼續激戰，不過我相信佢哋好快又會變返萬分尷尬，是但啦，行下行下我哋又好自然咁行返去食物閣。
妹：「點呀，重使唔使我幫你哋填問卷？」


Q：「唔使喇，我諗聽日叫Miss幫我哋填會比較適合…」
妹：「見你哋兩個都幾做得嘢，就請你哋食晚飯啦，唔使趕住返屋企交人呀？」
我：「絕對唔使，多謝靚靚姐姐！」我呢一句換嚟兩位靚女對我投以奇異嘅目光，是但啦，我都係講事實。
呢位細妹帶住類似Zilvia嘅氣質，但又撈緊啲YY款嘅港女氣場，其實係幾正，絕對有女神級數，只可以話差過幽蘭同QQ一個馬鼻。
呢度有間中式客飯睇落幾吸引，但同靚女食飯揀埋啲咁嘅嘢會有失佢哋身份，所以我唯有屈就啲食份加大嘅胡椒廚房，QQ揀咗份異常奇怪嘅芝士番茄凡立貝拉麪，而我哋嘅姐姐人哋嘅妹妹就食MOS漢堡，再嗌多份韓式炸雞一齊share。可能因為開心，我哋都特別好胃口。
Q：「唔知佢哋兩個而家點呢？」
妹：「重可以點吖，肯定又係奇奇怪怪樣咁食飯。」
我：「諗起Miss個表情，我唔知道以後點樣專心上堂…」
Q：「扮乜嘢吖你，中文堂你有幾可專心過喎…呀，係喎，差啲唔記得咗，預祝姐姐妳新婚快樂！」