thriXt Qantasy 純文字安眠之作 (New: - U2K - 一直上架): K633

Q：「如果佢只係諗住玩玩下嘅話，大可以將對你嘅不滿收收埋埋，繼繼呃飲呃食收多幾份禮物直至搵到下一個為止；對一個認真嘅女人嚟講，聽你解釋就係畀機會你，畀得機會就係預咗要原諒你，如果你係一個壞男人嘅話就必然會繼續犯錯，然後成件事喺度輪迴，所以一個聰明嘅女人係唔應該聽壞男人嘅解釋嚟傷害自己。」
妹：「正解，一百分，好學生。」佢望住QQ會心微笑。
QQ實在係太精通男女之事同埋溝通技巧，所以先可以同啲唔同性格嘅姐妹一直保持住良好關係；而呢個阿sir佢…就十足十成個對住DSE試卷迷思嘅考生咁，Miss講得啱，呢幾個女神將來一定會超越佢。不過而家香港啲師資質素係咪差咗啲？好似要學生教返轉頭咁嘅…
我：「唔緊要啦，誤會已經解開，由而家開始好好互相理解就得，Miss佢其實好好人㗎。」
Q：「係呢，其實你點會無端端識到我哋個Miss嘅？」
哥：「咁啱暑假嗰陣我哋都俾學校迫去參加教統局舉辦嘅中文科老師交流研習活動，而我同佢就喺同一組入面，又咁啱我同佢住嘅地區差唔多，所以放學嗰陣就搭埋同一架巴士…呀，佢話重有兩個站就到。」終於收得返訊息。
妹：「咁上去地鐵站接人啦，好好對人哋呀。」
上到去等咗陣個傻豬就嚟到，面紅紅咁，唔止係因為唔好意思，重因為佢化咗個比平時返學燶少少嘅妝，至於質素就…QY都完勝佢啦，況且嗰幾個女神素顏就已經秒殺大部份女人，如果我係女嘅都實唔多妥佢哋。
鄧：「張sir，對唔住，我唔應該block咗你嘅，同埋…我啲學生，喺度亂咁嚟…我為此向你致歉。」
哥：「唔緊要啦，妳明白我係乜嘢人就好，過咗去嘅嘢唔使擺喺心度。」然後佢哋就靜咗，氣氛尷尬到核爆。




個細妹望住佢阿哥，我同QQ就望住Miss…
妹：「哎，你兩個做乜靜晒咁呀？」
哥：「你哋咁樣望住我哋點講嘢呀？」
妹：「救命，你兩個教書㗎，平時幾廿個學生望住又可以講到嘢嘅？」
鄧：「咁…點同喎，細妹妳好…」
妹：「你哋無嘢講，又無誤會咯，其實可以散場㗎喎。」
哥：「咁又唔係嘅…」
妹：「阿哥你有嘢好快啲同人講喇下，雖然我就實早過你結婚，但都唔想睇住你娶唔到老婆。」
我：「咪係囉，陣間你攪到某人變咗剩女，係會嚴重影響我哋上堂嘅品質。」呢句換嚟一啲想殺咗我但又落唔到手嘅視線，因為真話永遠係難聽嘅，畢竟都已經年幾…
哥：「咁…呢個…鄧老師，如果…我想同妳認真交往，請問…可以嗎？」嘩，佢咁樣點教說話練習呀？




鄧：「係，可以嘅…」然後佢兩個硬直咗咁企喺度。