係同屋失友?定係同居勿友?只想同妳做普通朋友…🤦🏻♂️: K632
哥:「鄧老師,對唔住呀,其實係我令妳誤會就真…」
鄧:「Sor…sorry李sir!都係我啲學生亂咁嚟,你哋喺邊呀?我即刻嚟同你道歉,等我一陣,好快。」做港女做到佢咁款都可以話係完全失敗,如果YY知道實笑死。
哥:「我哋就喺樂富商場。」
鄧:「OK!等我廿分鐘,呀,唔係,三十分鐘之內到…」
佢講完就收咗線,十足十成隻傻豬豬咁,是但一個聰明啲嘅男人都可以好容易氹掂佢中出即飛,但係佢個樣又真係唔多吸引啲壞男人,或者不忍下手掛…
我:「彷彿…聽到佢裙拉褲甩,將唇膏同眉筆調轉咗嚟用嘅場景。」重有換過條新底褲同揀靚Bra…
妹:「你好似好瞭解你個Miss咁喎。」
我:「OK啦,話晒對咗年幾,而且佢份人好簡單,個腦除咗中文科之外就乜都無。」
妹:「咁同佢幾襯吖,呢個又係剩係識中文,女都唔識溝,我完全唔明你哋點解會誤會佢背住未婚妻走去偷食你Miss,簡直係匪夷所思。」
Q:「嗱,唔關我事㗎,完全係呢條友覺得全世界男人都係花心。」
哥:「阿妹唔好咁講啦,教壞啲學生呀…」
妹:「教乜鬼壞學生喎,你又唔係教佢哋間學校,而且一睇就知佢哋人細鬼大啦,一早同你講咗明明你間學校都有後生靚女Miss,偏偏你就唔敢去識,係要等到其他學校嘅先敢去馬,自己攞嚟煩。」
哥:「你唔覺得…喺自己間學校結識異性會好奇怪嘅咩,全間學校嘅學生都睇住你,重有老細。」
妹:「你都黐線嘅,學校就話為咗形象同埋成績勸喻學生唔好拍拖啫,你係去做先生咋,唔係叫你去做埋神父呀,同埋你係咪當呢個年代啲學生傻㗎,你間學校啲Miss一樣會大肚同生仔㗎,唔敢識異性…」唉,香港啲靚女,個個都嘴叨叨,叫我哋如何自處喎。
哥:「唔緊要啦,而家都識到個其他學校嘅。」
妹:「你今次好彩咋,好在呢兩隻嘢唔死心肯搞清楚事實嘅真相,如果唔係…我同你講呀,呢個世界無乜幾多人可以一擊即中㗎,幾年先識一個,拖下拖下就得返啲剩女你揀,到時就唔好後悔。」
哥:「嗯…只係我唔明白,點解佢死都唔肯畀個機會我解釋,會唔會係佢本身就唔係太鍾意我,無諗住…」
妹:「同你講多兩句都嫌嘥口水,自己好好領悟啦。」
Q:「Miss唔畀機會你解釋,係因為佢對你係認真嘅。」
哥:「吓…何出此言呢?」
妹:「唉,拜託小妹妹妳好好點醒呢嚿木頭。」