係同屋失友?定係同居勿友?只想同妳做普通朋友…🤦🏻♂️: K631
妹:「吓…乜事呀…幫唔到你填問卷啫…」
Q:「唔係呀,呢條友…佢攪到妳阿哥俾Miss block咗呀!」點解…要講到我錯晒,成個甲級戰犯咁。
哥:「吓…係…點解會咁…到底發生乜事?」
最後,當然由中文口試A嘅QQ簡單向佢哋解釋到底發生乜事,呢個時候個男嘅先恍然大悟。
妹:「哦!我認得妳喇!就係嗰日金鋪兩個靚女嘅其中一個!」靚小妹妹啫,唔好咁啦…
Q:「係…對唔住,都係怪呢條友多事亂打小報告。」
哥:「唔緊要,佢都係為自己老師著想,驚佢俾人呃…」
我:「無辦法啦,我個Miss有時又真係傻下傻下咁。」
Q:「重好講!你同我快啲打電話同Miss解釋返吖。」
我:「知喇…妳等我轆下個通訊錄先啦。」
哥:「等…等一陣先…我未準備好…」
妹:「有乜好準備呀?你又無做錯任何嘢!」
哥:「但…我攪到佢呢兩個禮拜咁唔開心,唔知同佢講乜好…你哋等我諗諗先。」
妹:「有乜好諗呀!你平時點教中文㗎?唔通同啲學生講…中文oral未講到出口就諗多陣先呀?」
哥:「點同喎,佢係女仔嚟…又唔係考試。」
Q:「放心啦,呢條友會搞返掂㗎喇,睇佢表演啦。」
我:「拜託…唔好畀壓力我,畢竟佢都係我個先生嚟。」
Q:「快啲呀,你從來都唔係尊師重道㗎啦,重扮嘢。」
我:「喂,Miss,我係妳個親愛嘅科長呀,麻煩唔該想阻妳少少時間…」
鄧:「喂,死人爽,我唔得閒應酬你呀…唔好同我講你喺出面惹到事呀下,我唔想知,拜託。」現實得佢。
我:「點會呢,我咁乖…唔關我事㗎,係關於你條仔…呀唔係,係妳個男仔朋友嘅事情。」
鄧:「你唔好同我講佢跟踪到我返屋企呀,唔好嚇我…」
我:「無啲咁嘅事,只係喺我屢敗屢戰嘅明查暗訪下,終於俾我發現到佢同嗰個女仔嘅多啲事情。」
鄧:「唔使同我講,我完全無興趣知。」
我:「妳會有興趣㗎,因為個靚女係佢個妹嚟…」
鄧:「乜話?!你唔早講!咁而家點算好呀?」
我:「哎吔,我都係啱啱知咋,所以即刻嚟通知妳。」
鄧:「死啦…我咁對佢…佢而家一定嬲死咗我…」
我:「咪話咗妳囉,好歹俾個機會佢解釋下吖嘛,最多咪喺學校門口兜嘢升巴佢。」
鄧:「黐線㗎咩你,一日最衰都係你!咁我而家係咪要unblock佢?但係…佢可能已經嬲到唔想理我…」
我:「Miss,最多我將功補過,諗辦法同妳拆掂佢,到時佢就唔會怪妳蠻不講理咁block晒佢。」
鄧:「你又有乜屎橋呀,唔好攪出個大頭佛喎。」
我:「梗係唔會啦,信我就得,因為佢而家就係喺我隔籬,佢話唔會嬲妳㗎喇。」
鄧:「吓!你又玩Miss?!」