為了實現媽媽遺願，我成為了女兒國唐僧: K630

Q：「睬你都傻。」然後佢拖住我去到遠處嘅一角坐低咗，好彩呢度有其他學生情侶喺度偷情等我有嘢昅。
做乜唔昅QQ？隔籬飯香吖嘛，我昅下人哋條女，人哋又昅返我條女，可惜QQ唔係我條女…唉。
等咗十五分鐘到就有條女坐咗落去條友對面，係佢未婚妻嚟，我同QQ打醒十二分精神觀察，而佢哋都唔似有嗌嘢食嘅打算，只係一路喺度謦欬。
我：「攪乜㗎，佢搵唔到Miss唔開心我明，但做乜老婆嚟到之後個樣重好似死老婆咁款？」
Q：「其實有好多男人想死老婆㗎…認真，我都唔明。」
隔咗陣條女喺張枱上面搭住男人隻手，似係安慰佢。
我：「老公，唔緊要啦，今次呢條女食唔到咪換另一條囉，我最支持你㗎嘞，最多返去屌住我先啦…」
Q：「屌…識到你真係我人生最大嘅不幸。」
我：「嗱，唔關我事，我只係盡可能合理咁解釋件事。」
Q：「係你呢啲咁變態嘅人先會覺得咁樣係合理。」




我：「唓，係妳哋女仔用有色眼鏡睇我哋咋嘛，男人鹹濕本來就天經地義…呀，會唔會佢兩個其實係賊公賊婆，接近Miss只係為咗呃佢啲錢，可惜而家條水魚游走咗。」
Q：「唔多似喎，呢兩個人撈偏似乎會好快餓死。」
我：「所以咪唯有搵著Miss呢啲無肉食嘅水魚。」
Q：「諗埋晒啲黐線嘢都唔會有結果，我決定主動出擊！」佢講完就喺部電話打字。
我：「妳諗住點呀，問佢為乜要等我哋Miss呀？」
Q：「唔係，我只係要證實佢哋嘅情侶關係，無論點亂七八糟，我相信Miss都唔會接受到一個有婦之夫。」
我：「換言之係咪妳就接受到？」
Q：「睇情況啦，凡事無絕對…嗱，我哋而家過去扮做問卷調查，你好同我醒醒定定。」
我：「小心人哋會以為妳係保險女屌走妳呀…」
Q：「你當我係乜？明明我就係年輕青春貌美可愛嘅學生妹嚟。」唔講都唔覺，一講就覺得佢feel有啲似保險女…




跟手佢就捉埋我過去，轉咗半個圈後我哋斯斯文文咁行到去佢哋張枱側邊，所以話防人之心不可無呢…
Q：「你哋好呀，我哋學校有份專題報告係研究年輕情侶對飲食消費嘅態度，唔知介唔介意阻你哋兩分鐘，希望可以幫手填份問卷呢？」呢個QQ…cosplay保險女嘅話真係入骨咁滯，如果佢目標係男嘅話相信成功率會好高。
佢兩個先係呆咗一呆，互望，然後條女就開始講嘢。
女：「欸…唔好意思，唔係話唔肯幫你哋，但我同佢…並唔係情侶關係嚟。」
我：「兩位郎才女貌，竟然唔係男女朋友？」
女：「Sorry…我係佢個妹。」我塊面隨即一條條黑線…
Q：「死火喇你！今次係你闖咗大禍，快啲同人道歉呀…」