係同屋失友？定係同居勿友？只想同妳做普通朋友…🤦🏻‍♂️: K629

我：「唔好咁講自己啦，妳有妳嘅優點嘅。」
蚊：「優點就係容易食，同埋好恰。」
明明好地地一個女仔…我於心不忍狠狠嘴咗落去。
呢個世界何嘗公平過？雖然有時覺得啲女神都唔係過得特別好…
我：「唔好誤會，我唔係恰妳…」
蚊：「我知呀，如果你重有機會同我做愛，咁原因就一定係你愛我。」然後佢又甜絲絲咁挨返住我。
算啦，就等沉默嚟解答我哋嘅問題。無可否認我經常性因為性需要而寵幸QQ，咁我其實係咪愛佢？但又唔可以咁講，正如YY都可以好容易咁挑起我嘅性慾，但我從來無諗過愛唔愛佢，只會覺得同佢相處係幾得意。
或者細蚊呢刻先真正覺得同我係拍緊拖掛，而我就係一個PTBF，賣心唔賣身嗰隻，因為我已經賣唔起。
我：「呀，佢行喇，細蚊，我要打個電話先。」
作為邦女郎嘅佢十分醒目，即刻拖住我彈起身，喺對面馬路向住同一個方向行。


我：「喂，佢開始行喇，向緊妳嗰邊嘅方向。」
Q：「我有眼睇到㗎，準備落樓，再講啦。」
細蚊拖到我去馬路燈口位，無同我講啲乜，鬆開咗我隻手再揮揮手，佢有佢返屋企，而我就過馬路…
跟咗一陣，條友行咗落去地鐵站，而QQ都好自然咁出現返喺我嘅身邊，好有換畫嘅感覺。
我：「其實佢唔再等Miss，我哋跟住佢又可以有乜用？」
Q：「唔知㗎…可能佢會落老蘭或者去叫雞呢。」
我：「呢個鐘數落老蘭？飲涼茶咩…如果佢去叫雞我真心佩服。」
Q：「呵，好笑，乜你有叫過雞咩？我同你講呀，好多雞蟲都係文弱書生咁嘅樣㗎咋。」
我：「欸，小姐…點解妳會咁清楚嘅呢？」
Q：「總之我知啦！你理鬼得我點解知吖。」


你話吖，呢啲咁霸道嘅港女又點解會得人鍾意嘅？
我哋好自然咁跟住嗰位先生嘅後面一直行，落到地鐵站，上車再落埋車，然後又去咗我第一次撞到佢嘅地方即係樂富。佢個樣一直都好sad，完全唔似一個準備緊結婚嘅人，我開始編劇上身要幫佢諗個合理嘅解釋；佢一定係俾人迫婚自己唔想結，所以就想趁機溝我個Miss走人，因為可以借啲意激走自己個未婚妻…但明明個老婆咁靚點解都…唔通佢性格好差？定係屌厭咗呢？
啊，一定係大食女遇著腎虧男，嘻，好彩我機能正常。
行咗一陣條友嚟到food court坐低咗，嘢食又唔嗌，認真無聊到爆，Miss點解會同呢啲男人玩㗎。
我：「不如我哋食個早飯先，呢度啲嘢幾吸引。」
Q：「梗係唔得啦，如果食到一半佢行開點算？」
我：「咁就…妳負責跟住佢，我繼續食埋佢就搞掂。」