為了實現媽媽遺願，我成為了女兒國唐僧: K627

我：「以妳性格…就算有個男同學想俾妳調戲妳都唔識玩啦，我就無可能㗎喇，身邊啲女仔已經煩死咗我，所以唔使擔心，我想講妳係個好女仔，好Miss嚟㗎，所以唔使為咗啲無謂人咁唔開心喎，打起精神啦，好快實會有人識得欣賞妳。」
鄧：「我嘅事…關你乜嘢事喎，專心讀書啦你，不過妳唔使讚我，日日見到你身邊嗰幾個女仔，就知道佢哋好快會叻過我，我只係一個平平無奇嘅中文科教師。」
我：「平平無奇…又有乜所謂，過得開心先係贏呀。」
鄧：「衰嘢返去做功課啦，咪阻住我改文，唔得閒理你哋呢啲異性生物呀！」佢好似精神返啲。
出校門嗰陣又見到嗰位先生，個樣奇奇怪怪咁。
今日放學無乜課外活動，我同QQ好快就返到屋企。
Q：「你個變態做乜放學返到嚟係咁望落樓下呀？係咪嫌屋企個女神已經睇厭咗所以要昅其他學生妹？」
我：「可能啦，唔知幽蘭佢幾時放學呢？」
Q：「原來係咁，估唔到你份人咁老實。」如果我昅嘅係同佢品質相當嘅女神，睇怕佢就唔會搵我麻煩。
我：「唔係呀，講笑咋，係Miss條仔…嗰位阿哥，Miss唔理佢之後就係咁嚟接人放學，已經第三日喇。」




Q：「吓？！你又唔早講？等我睇下。」佢又望落去。
我：「之前…我剩係擔心妳唔見咗嘅事吖嘛，不過妳又會咁大反應嘅，妳唔係同情啲一腳踏兩船嘅仔呀？」
Q：「點會，但問題係如果佢一腳踏兩船，Miss唔理佢頂多咪煩佢一陣，會唔會過咗咁耐重嚟搵佢呀？」
我：「可能…或者Miss係處女，佢食唔到唔安樂呢。」
Q：「就算係，人哋都就結婚，值唔值得嘥咁多心機同時間，況且佢個未婚妻靚過Miss咁多，就算處女又點喎，唔見你食埋韻婷先走人？」
我：「其實我都覺得怪怪哋…」我決定無視佢後面嗰半句，因為我內心其實好掙扎，一直愧咎自己罪大惡極。
Q：「嗯，我覺得我哋有必要調查一下。」
我：「三唔識七可以點調查？唔通行埋去問佢有幾多個老婆，定係對處女情意結究竟有幾執著？」
Q：「低B，做返你最鍾意做嘅嘢，跟踪下佢啦。」
我：「妳講真㗎？唔知等幾耐佢先肯走㗎喎。」




Q：「你都識講佢等咗三日，我哋最多等一日啫。」
我：「但係，如果妳喺附近行來行去好似有啲怪…」
Q：「我都明…所以會匿喺後樓梯度standby，總之換衫先啦，希望幫Miss搵到個答案。」
估唔到QQ會上心到好似神探上身咁，換咗一套唔多起眼嘅衫褲，白T牛仔褲加件米色針織外套同口罩…我諗佢啲姐妹見到都未必認得係佢。