為了實現媽媽遺願，我成為了女兒國唐僧: K626

全部幫手嘅人都交晒功課，唯獨思韻同細龜一粒都無整爛到，睇嚟宅男嘅功力實在唔可以睇小，聽聞佢哋就連睇寫真集前都要戴手套。
幽蘭同Zilvia兩個聽日要打羽毛球所以就負責今日嘅section，另外重有男班長同主席，天王星讚細龜一粒都無整爛所以奬佢呢兩日唔使留堂幫手；我諗佢其實係知道留細龜喺度會悶親佢兼夾幫唔到啲乜，因為今日嘅topic係度位…你話死唔死，整塊死人壁報攪到要請畫則師咁。
而我收齊晒所有中作之後就可以攞落去交貨走人，唔好以為兩堂作文堂真係夠我哋所有人完工，所以Miss寧願我哋放學先交好過改啲甩皮甩骨嘅文，通常我就係要等細龜同埋啲讀書女嘅作品。至於我？左抄一句右抄一句已經成事，唔係話我濫用科長權力偷睇同學啲文，而係左右女神實在太強橫，喺佢哋幫手之下我根本唔使作，只係做句子拼接，加埋我對分數又無乜要求。
咦…出面嗰個咪係？
我喺教員室門口嗌咗兩聲都無人應，門口有個數學sir睇唔過眼叫咗我入去，諗住放低嘢就走人點知我又見到Miss死魚咁趴咗喺枱面…
我：「Miss…收齊晒作文喇。」
鄧：「咦…你嚟咗呀，辛苦晒，唔該。」佢講完就繼續趴喺枱面，個樣都幾殘下，似乎唔想我見到佢。
我：「嗰位先生…今日又喺出面。」
鄧：「我知道，佢攪到我唔敢準時放工，已經第三日係咁…啱晒，改完疊文睇怕都已經七點。」一個先生八點幾就要返工，攪到改埋功課七點先走得，真心戥佢慘。
我：「唔好咁灰啦，男人咋嘛，天下有一半都係。」我烏低身搭住佢膊頭，掃咗幾嘢，希望安慰下佢，話晒佢都叫有用心幫過我，唔忍心睇住佢成坺嘢咁。




鄧：「喂！你做乜黐身黐勢…唔好諗啲奇怪嘢好喎！」佢突然之間又彈返起身，露出驚詫嘅表情。
我：「妳…唔係諗住我會對妳…乜嘢呀，諗住氹下妳開心啫，不過諗深一層又係，如果要喺呢間學校搞師生戀嘅話實在係無乜選擇，後生Miss得嗰幾個，似乎妳係最佳人選。」我認啲動作係越咗界嘅，平時成日黐住嗰幾條女，乜嘢男女授受不親嘅詞句早就唔記得一乾二淨。
鄧：「咪亂講，你係危險人物，唔好攪到我無咗份工唔該。」又會咁認真嘅，真係服咗佢。