係同屋失友?定係同居勿友?只想同妳做普通朋友…🤦🏻♂️: K620
Y:「真心又使乜講出嚟呢,我知道佢實聽晒妳話嘅。」
我:「就算係乜…都唔會聽晒我話啦,如果唔係我不如叫男班長唔好硬碰Uranus好過,可以慳返好多功夫,妳鍾意同阿爽玩我無意見,但佢未必肯聽妳枝笛㗎喎,呢啲嘢唔到我控制。」
Y:「總之妳唔反對就得,非常感謝。」
呢個姣婆到底攪乜鬼?係咪控制唔到團長就搵第二條仔嚟示威?好難理解…
※※※※※
興:「碰!」咪誤會,我哋玩緊新式橋牌,我發明嘅。
我:「上!九章!」等你碰得咁過癮吖嗱。
興:「玩咩QKA邊有得上㗎?唔通麻雀又可以九萬十萬一萬咁上喇喎?」
我:「當然唔得,因為麻雀係無十萬呢隻牌。」
興:「九萬十萬…十筒…十索…又好似真係無。」
我:「講錯嘢當食詐糊,今鋪你輸。」
興:「喂,但係你未講清楚規則喎,到底QKA係咪…」
突然全世界靜晒,所有橋牌之友望一望門口又望住我,原來係Q女神同Y女神大駕光臨,憑住佢哋貪婪嘅眼神,就知道佢哋係嚟搵我…笨。
我:「我下次再修改規則啦,再見先!」
興:「我地理老媚吖!」
出到門口見到兩位美女,奇奇怪怪咁…話雖我同佢兩個親如姐妹啫,平時都唔會失驚無神走嚟搵我,今次重要打孖上,唔通…佢哋喺度詏緊邊個口技好啲可以令條仔快啲出貨?哎唷,咁客氣做乜,呢啲嘢都好爭嘅,輪流嚟咪得囉,兩次咁大把我都重出到貨嘅。
我:「歡迎兩位美女大駕光臨,請恕小弟有失遠迎,未知所為何事?」不變應萬變,假膠少不免,對住佢哋扮返個店小二唔止保護我,重係保護緊佢哋。
Y:「我有話直說,夾band嗰邊我哋要搵人幫手。」
我:「吓,我doremi都未識分妳哋走嚟搵我?」
Q:「好似話唔使識音樂都得,你最得閒吖嘛,不過呢…佢好似有啲特別要求…」QQ欲言又止咁。
Y:「就係,你可唔可以暫時扮住我隻兵先?」雖則我都知無論在明在暗妳哋都係搵我笨,但咁直接叫我點反應?
我:「黐線,我從來都唔會做女仔隻兵,咪攪我。」
Y:「喂,你唔好唔記得你重聽緊天王星話喎。」
我:「點同,咁係因為我輸咗比佢,同埋我唔係做佢隻兵,我只係聽佢命令幫佢辦事,我係唔會舐佢鞋底嘅,一個係被動,一個係主動,妳哋點會唔識分。」如果有天王星隻臭腳舐我點會唔舐吖,不過講完之後先發覺我唔係兵,但同隻狗無乜分別。