係同屋失友？定係同居勿友？只想同妳做普通朋友…🤦🏻‍♂️: K619

就係咁，佢抄晒我哋五個嘅牌…不過又無嘢嘅，呢啲仔出到去係調轉俾女抄返牌都似。雖然我唔想認自己係一個壞女人，但真係有一剎那係覺得佢各方面都比我男朋友好，除咗佢身邊實有好多女之外。
A：「咁，不如我順便加埋大家IG？」
Z：「我無玩IG，得個空殼間唔中睇下人哋嘢…」
V：「我嗰邊同公式介紹無分別，得啲表演相同畢業相…」
A：「唔緊要啦，有嗰啲就加住先，有備無患吖嘛。」
呢個人養尊處優，但點解啲厚面皮咁似某人嘅…
A：「嘩，妳個惡女吖，著住跑步衫個look好正喎，重要唔係普通PE衫，呢隻燒鵝髀呢…有啲後悔頭先唔接受妳嘅提議添，食之不可惜呀！」
U：「你試下再講吖嗱？！」
A：「無所謂喎，呢度在場都係妳姐妹，有乜好怕醜？」
Y：「要私片唔該再約，咁我哋而家重有乜嘢準備工作？」




A：「音樂日都係禮堂搞㗎啦，我想去睇下啲硬件。」
然後我哋就安排咗佢去參觀禮堂，好彩周圍無乜人。
A：「咦，係PEAVEY十五吋喇叭喎，唔錯唔錯…」呢個人望住個掛牆喇叭自言自語，認真夠晒奇怪。
跟住我哋就去咗後台控制室，對我嚟講就係一個用嚟插咪線嘅地方，團長望住個控制台若有所思咁。
A：「欸，我想要搵多個幫手，最好係男仔嚟。」
呢個時候我哋妳眼望我眼，講男仔幫手最簡單就梗係…
我：「咁或者我去搵一搵…」
Y：「我都一齊去吖！」佢嘅反應嚇咗我一跳，攪乜？
其實佢哋梗知道我去搵交叉仔㗎啦，但易汪做乜又跟埋嚟？點知一出咗禮堂之後呢個女人就講咗啲好嚇人嘅…
Y：「Queenie，有樣嘢想拜託妳，可唔可以借阿爽嚟用？」呢個就係佢要跟埋嚟嘅原因？




Q：「吓…但係我唔明妳乜嘢意思喎。」
Y：「因為…話晒團長係我請返嚟…妳知啦…如果我喺學校唔受歡迎就唔太好睇…所以想借佢嚟做我隻兵…」
我O咗嘴，妳有無咁死要面呀，平時又少少薄面都唔肯畀啲仔，而家要見人就想有堆仔跟住自己咁天真…
我：「之但係…其實我同佢無乜關係㗎咋，妳問我嚟做咩…今時今日妳不如問Uranus好過啦。」
Y：「認真啦，邊個係大邊個係細我點會唔識分，佢哋嗰啲係票面嚟嘅啫，阿爽真心冧嘅係妳。」
我：「咪亂講好喎，真心，佢從來都無對我講過啲咁嘅嘢，妳話男班長冧我反而就無得駁。」