為了實現媽媽遺願，我成為了女兒國唐僧: K618

A：「另外，我諗妳哋都唔會真係諗住夾band㗎啦，只係想用速食方法係比賽入面贏啫，我講得啱唔啱？」
U：「無錯。」誠實得妳吖…
A：「所以，呢首歌係有另一段女仔band cover過嘅，雖然有啲玩票性質…就係BanG Dream入面嘅Morfonica，不問原因只問結果，如果妳哋可以複製到佢哋嘅演出就已經十拿九穩，最好可以超越佢哋啦…」
V：「嘩！好靚女呀！」佢望住個螢幕非常興奮…
誠然，日本喺製作呢啲宅男娛樂方面真係非常出色；再聽多一次首歌，比起原唱實在係爭緊幾條街，之但係…由五個咁可愛嘅小姐姐嚟表演又實在係唔同風味。
衰啲講句，佢哋同我彈琴畀fans聽其實差唔多啫。
Y：「想問…拉小提琴嗰個係Ayasa嚟？」
A：「無錯，就係以前好出名嗰個YouTuber。」
Y：「估唔到佢都會走咗去玩呢啲團，我無睇好耐。」
A：「音樂家都要搵食㗎，邊度有糧出咪去邊度玩囉…」




而呢個時候音樂室埲牆就傳嚟一啲輕微嘅鼓聲。
A：「咦，呢度隔籬就係band房嗱？」
U：「係呀，呢個鐘數應該係我哋嘅對手喺度練習緊。」
跟住團長就好似偷蕃薯咁行埋去貼隻耳仔上牆…點解呢個人啲動作可以咁奇奇怪怪，實在浪費晒佢英俊嘅外表。
而最神奇嘅係除咗我同易汪之外，嗰三隻嘢都學埋佢。
A：「咦，係Bon Jovi嘅妳給愛情一個壞名字喎。」
Y：「玩咩，人哋首歌好地地英文名做乜要翻譯？」
A：「等佢哋無咁型吖嘛…睇嚟佢哋都幾唔妥女性生物咁喎，係咪俾港女折磨過嚟？An angel’s smile is what you sell…」實在係輕佻得佢…
Y：「呢層唔太知，感覺上只係幾個讕醒中產小朋友。」
A：「即係好似妳咁？」…。




Y：「無呀！對比起你我係窮人嚟㗎咋。」
A：「我可唔可以入去夾埋一份㗎？」
Y：「你夠膽就試下，團長都無情講㗎。」
平時…實在係無機會見到易汪會用呢種方式同男仔溝通…
A：「學校就剩係得入面一set鼓？」
Y：「係呀，呢度津校嚟可以有幾多資源喎。」
A：「咁妳諗住可以有幾多時間練，打走入面幾隻嘢？」
U：「呢層…都無辦法，卜到就卜啦，係要爭㗎喇。」
A：「哦可，咁…喺有譜之前大家暫時都未有嘢做到住，Vienna，我信得過妳，可唔可以將頭先兩段片入面鋼琴嘅部分抽出嚟寫譜，我知個arrangement有唔同，而妳都可以加以修飾，記住唔係寫solo譜就得。」
V：「嗯，我明你講乜，一日就可以完工。」




A：「呀，不如我哋開個chat group先，方便溝通吖嘛。」