thriXt Qantasy 純文字安眠之作 (New: - U2K - 一直上架): K617

但咁樣翻炒法實會招人話柄，而且既然難得夾band我諗大家都會傾向揀首狂野少少嘅音樂，唔通真係讕係有氣氛咁整首海闊天空咩…不過我想講呢啲越係簡單嘅演奏就越係難做得好，加埋對主唱有非常嚴格嘅要求…
A：「然後…Vienna妳就負責鋼琴同lead guitar，無問題吖嘛？」又小提琴又鋼琴…睇嚟佢…
V：「無問題，但係我可以點樣同一時間玩兩樣樂器？」
A：「放心，我會安排，之後就到Zilvia嘅rhythm guitar，知道妳係處女表演結他，記得好好練習。」
Z：「知道，我會努力…」
A：「然後Queenie負責鋼琴同keyboard。」
Q：「OK。」雖然唔係太理解我應該點配合呢兩樣差唔多嘅工具嚟玩，但至少對我嚟講不成問題。
A：「咁既然妳鍾意打鼓就打鼓啦，安排完畢。」
Y：「團長…咁樣咪無人負責bass囉，你係諗住skip咗佢吖，錄段track嚟做底音吖，定係由你上嚟負責呢？」
A：「基本上我就從來唔會教人打茅波嘅，只要技術上可行嘅話，而rock band無咗bass又真係會失色不少，但事實上電子bass奏出嚟嘅都係一種電子形式嘅聲音嚟啫，Queenie，妳覺得如果我寫段bass畀妳喺keyboard上面模擬返出嚟妳hand唔handle到？雖然有啲chord同弦樂技巧上嘅限制。」




我：「只要睇落係琴譜就問題不大，弦樂技巧嘅話應該可以用轆轆嚟模擬？」
A：「妳到時有手先算啦…咁bass嗰part就畀妳㗎喇，搞掂，咁我抖返陣洗洗睡先。」
Y：「抖你個頭呀，咁我哋要彈乜呀…」
A：「哎吔，等我諗下先啦…記住用腦係好重要嘅，好多嘢唔係死鋤爛鋤就有效果，妳哋咁多靚女圍住我攪到我諗唔到嘢，Yvonne妳幫我摙背等我定一定神。」
估唔到平時氣焰囂張嘅易汪都會有咁嘅一日…真係一物治一物，佢靚仔到咁叫呢個姣婆點企硬喎。
A：「其實妳哋都無頭緒㗎啦，香港啲歌無乜幾多首適合夾band，如果日文歌妳哋OK嘛？」
V：「可以，日文嘅話發音更加易，你話事就得。」
A：「好，咁我宣佈曲目就係Janne Da Arc嘅月光花，請問在座幾位有無人聽過呢？」
我：「嗯…係怪醫秦博士嘅OP嚟。」睇嚟得我識…
A：「非常好，幾驚妳同我講怪醫黑傑克呀，咁未聽過呢首歌嘅就不如而家一齊聽一聽先…」




佢打開電話入面嘅YouTube播畀我哋聽；其實我聽呢首歌嘅時候只係小學生，所以已經無乜印象，但係聽到幾粒音啲感覺又返晒嚟。全首歌有大量嘅小提琴音貫穿其中，唔使特別修譜就已經可以俾易汪盡情發揮；整體難度唔算太高，曲風唔會話太過偏向男性化，的確幾適合攞嚟俾我哋夾band用。