為了實現媽媽遺願，我成為了女兒國唐僧: K616

A：「呀，夠嘞…哎…妳唔好鍾意我呀…」然後佢就去咗開門，放返佢哋四個入嚟。
※※※※※
Y：「嘩，妳做乜塊面紅晒㗎？重呆晒咁…」
U：「喂！你究竟對佢做咗啲乜嚟呀？」
我：「無事吖嘛？有無蝕底俾佢…」Zilvia本來面紅耳赤咁呆坐喺度，見我行埋去烏低身慰問佢…就即刻企咗起身攬到我實一實…呢種感覺好奇怪，性格嬌小嘅佢但係就高過我，心口好用力咁壓住我對波。
我：「如果發生咗啲乜就細細聲話我聽啦，我一定會保護妳嘅，唔使驚…」
Z：「無乜事…叫Uranus佢唔好咁惡…」
以我嘅經驗，Zilvia佢唔似係遭遇咗啲乜嘢不幸，反而似係有啲發情，雖然我唔係男仔但我感覺得到。
擾攘完一輪，佢哋終於開始平靜返。
Y：「哎吔，無謂嘈啦，Zilvia都話無事，不如講下你諗住點幫我哋先啦…」易汪處事方針都係比較實際。




A：「咪係囉，佢而家救咗妳重喺度鬼死咁惡，如果唔係妳實要同我上床都似。」
U：「家陣贏梗㗎？你咁有信心？如果輸咗點算先？」
A：「輸咗…我俾妳任做囉，或者五姐妹一齊上都得，我會忍住唔喊出嚟。」…無賴程度堪比交叉仔。
Y：「喂，認真呀，唔好浪費時間，你兩個如果要做就再約時間啦。」天王星想反擊但忍住咗。
A：「好，咁我都唔玩嘞，既然妳哋乜都未準備過，就由我嚟安排妳哋嘅position啦，雖然本人其實未夾過band…首先，阿女妳負責返最拿手嘅小提琴先。」
Y：「乜話？你無計錯呀？我哋而家係夾band喎…」
A：「點會計錯，妳邊樣叻咪玩邊樣，夾band唔一定得結他㗎喎，妳唔係鍾意電子小提琴咩？」
Y：「我知，但如果我玩小提琴咪少咗個常規位置？」
A：「邊個咁樣教妳音樂㗎？妳玩管弦樂團有無聽過常規鋼琴或者常規小提琴？無吖嘛，成個管弦樂團係得個唔出聲嘅指揮係常規㗎咋…音樂係自由嘅，用乜嘢樂器係視乎曲目，當前資源同埋想營造出乜嘢音色同氣氛。」
Y：「我明…但用小提琴啲band多數係symphonic rock，通常都好黐線，我哋搞唔掂㗎喎。」




A：「傻瓜，就算最難嘅曲目都可以偷走一半以上嘅音符，呢啲嘢難有難做，易有易做，妳唔好俾夾band呢個框框困死自己啦。」的而且確，佢係啱嘅，例如暑假前我哋演奏過嘅Lydia就係一首重用小提琴嘅搖滾流行曲。