為了實現媽媽遺願，我成為了女兒國唐僧: K610

V：「如果要買嘅話我可以幫手㗎，乜嘢款都唔係問題。」幽蘭妳唔好咁啦，會嚇親人…
Z：「不過我哋連揀都唔識揀，好似重有啲乜effector…」
我：「如果要買…唔成問題嘅，不如聽咗意見先。」
Y：「呀，佢到咗校務處喇，我去接佢上嚟先。」
呢個時候Zilvia攞起咗部木結他，彈起單音版嘅天空之城，當然唔會期望玩開吹樂嘅佢會有乜技藝。
V：「點解係天空之城嘅？」
Z：「無呀，因為人生第一首認真學嘅音樂就係天空之城，所以…無論有乜嘢樂器喺手我都會試下彈呢首先，不過小提琴真心搞唔掂。」天真嘅佢望一望門口遠去嘅Yvonne…
呢個時候幽蘭攞起另一部木結他幫佢彈和弦，兩條聲合埋一齊就變得豐富同埋悅耳，呢個正正就係夾band嘅用處…但我哋又點會唔知吖，本身又唔係玩solo…
剩返嘅就係天王星呆呆咁望住佢兩個喺度玩。
講真成班姐妹玩音樂係開心嘅，但一嚟諗住必然要贏，二嚟重要係短時間入面帶一個外行人，你話點會唔頭痛吖？




過咗陣Yvonne就帶咗一個心口掛住訪客牌嘅哥哥上嚟，我諗…除咗Zilvia之外我哋個個都呆咗，因為勢估唔到Yvonne會識得一個咁高質嘅男仔，完全係望見心心眼咁嘅樣，但呢種不羈…似乎唔係好仔嚟，有啲似我EX。
Y：「妳哋可以叫佢做團長，佢會指導一下我哋關於夾band嘅嘢。」硬係覺得佢哋啲眼神有啲怪。
A：「關於妳哋嘅故仔我其實已經有個大概㗎嘞，咁阿女係乜嘢底細我本身好清楚，妳哋輪流講下自己嘅background先啦。」唔止感覺…就連行為都話畀我哋聽佢係一個花花公子，講嘢嗰陣佢晾咗隻手喺Yvonne膊頭上面，差啲就掂到對波嗰隻，如果唔識嘅話實以為兩個係一對，至於易汪呢個衰女就對佢嘅小動作零反應。
死人交叉仔小小嘢都討伐我，睇下易汪乜嘢德性先啦…
跟住我哋就逐個介紹自己，都係例牌嗰啲嘢咁啦。
A：「妳哋個個都係可做之才呀下…除咗妳，妳唔係諗住乜都唔識玩兩嘢，個零月之後就可以上台表演呀？」團長手指指咁質問天王星，一副唔客氣近乎咄咄逼人嘅口氣。