係同屋失友？定係同居勿友？只想同妳做普通朋友…🤦🏻‍♂️: K609

星期三，今日啲女神們個樣特別凝重；而我只係收到order星期五六要幫手搞掂埋塊壁報，佢哋今日放學就好似有私家會要開，健仔就成日攞住部電話喺度chat。
我：「如果無嘢要我留喺度幫手，咁我返屋企喇。」
而家日日放學好似要事先申請完先有得走人咁。
天王星望一望我無出聲，QQ就得個知字，YY當然…
V：「乜走呀，你唔記得今日要去橋牌活動嗱？」
我：「咁妳唔得閒嚟…我去唔去都無乜所謂啦。」
V：「梗係唔得啦，我嚟唔到住係因為有更加緊要嘅嘢搞咋，你同我去玩住先，謦完嘢就過嚟搵你，我以橋牌學會副會長嘅名義唔准你走咗去。」
其他女神見到佢咁樣都得啖笑，而我…同一件共享玩具有乜分別，你話共享男友就話啫，唉…
※※※※※
U：「Yvonne妳話搵咗人幫手，係邊個嚟㗎？」


Y：「高人一個嚟…係我出面管弦樂團個指揮，佢嚟緊㗎喇，我哋可以去音樂室等住先。」
U：「其實點解要搵人幫手嘅，妳哋幾個搞唔掂咩？」
Y：「始終我哋又無夾過band，有人幫手好啲嘅…」
我：「係呀，如果唔好好研究下啲基本功先，未必贏到嗰幾條仔㗎。」
好彩搵到人咋，一日咪就係妳同埋幽蘭…一個音樂零蛋以為肯學就乜都得，一個就以為自己音樂造詣高就可以為所欲為；本身我哋自己已經有一首曲目要參賽，而家重要疊住上，音樂日之前重要有UT…睇嚟嚟緊嘅日子會好甘。
入到音樂室，幽蘭見到部鋼琴就隨手彈咗幾句，係LEVEL5 judgelight，水平之高係可以令到玩開音樂嘅Yvonne同Zilvia都有啲意外。
我：「估唔到妳會識呢首歌。」
V：「無呀，暑假嗰陣喺日本睇電視聽到，覺得幾好聽所以就記住咗，好似係動畫啲歌嚟，嘻，我都好耐無彈琴喇，幾好玩。」我敢肯定佢一定無睇過電磁炮…
我：「屋企有琴妳唔彈咋嘛。」
V：「嗯…屋企部琴都唔好彈嘅。」我明嘅…佢部琴加埋個環境，坐喺上面彈錯咗一粒音都會好䒐，又點會好玩。


Z：「其實想問下，我哋連樂器都未有，應該點先…」
Y：「問人借都有嘅，呢度有個木結他，玩住先啦。」