為了實現媽媽遺願，我成為了女兒國唐僧: K611

U：「欸…我會好畀心機學，盡可能用晒啲時間嚟練習。」
A：「如果個零月就可以學有所成，香港嘅樂壇就唔會一池死水咁啦，世界唔會有窮人添呀。」串嘴得佢吖…
U：「我相信自己嘅資質同埋毅力一定比一般人好先，唔試過唔會知道結果。」佢盡可能為自己辯護。
A：「資質好好…如果係真嘅話以妳年紀應該拔尖讀緊U…」
Y：「團長…拜託你唔好玩，我哋幾個係認真嘅，而且明知道大難臨頭先搵你幫手，希望你可以指引一下…」易汪終於忍唔住幫口…
A：「聽完妳哋嘅資料，妳係諗住打鼓㗎啦。」
U：「我諗…應該唔會有更加好同合理嘅選擇。」
A：「妳係咪屋企放到set鼓喺度？可以點花時間練習？」
U：「應該唔得，但…我會盡可能借到學校嗰set嚟練。」
A：「妳係咪諗住自己肌肉發達，打鼓無音準問題，只要有蠻力就可以即學即用？」




U：「至少…會比其他樂器簡單些少。」
A：「有無諗過喺一隊band入面，鼓手就係其他成員嘅指揮嚟，妳完全無玩開音樂有無信心控制到tempo？如果妳快咗或者慢咗係咪就迫佢哋跟返妳，定係妳諗住可以參考返佢哋是但一個，有無諗過一亂就成隊亂晒？」
U：「欸…」就算係我都無信心答佢。
A：「雖然打鼓接近無音準問題，但係力度同位置係會影響音量同音色，再加上手腳協調，希望妳唔好太睇小呢種樂器演奏。」
U：「我明白…所以我會努力學…」以天王星平時嘅性格，甚少機會見到佢會細聲到咁，同蚊螆飛過差唔多。
A：「咁妳哋有無idea玩邊首歌？或者類型？」我哋五個連樂器分配都未搞掂，講乜嘢曲目吖，換嚟嘅係一片死寂。
A：「或者妳哋有無聽開乜嘢band？」
如果我答IVE呢啲女團實比佢秒殺，答X JAPAN亦分別不大，無理由是但噏隊F.I.R.出嚟㗎…
U：「其實都有嘅…」佢當然唔似我哋呢啲聽classical大。
A：「願聞其詳。」




U：「EPICA…同埋BABYMETAL…」
A：「哈…估唔到妳品味咁優良喎，death metal加opera女聲嘅天團…重有electro J-pop，如果妳肯努力一百年都可以諗辦法幫下妳嘅。」
Y：「而家唔係叫你嚟潤我哋呀！鬼唔知我哋大鑊咩，咁到底有無辦法可以幫到我哋先？！」
A：「辦法就一定有嘅，睇下幫到多定少嘅啫…不過重有一個問題，幫妳哋唔係問題，但係點解我要幫妳哋先？」