係同屋失友？定係同居勿友？只想同妳做普通朋友…🤦🏻‍♂️: K601

我：「聽落好似幾大鑊咁。」
Q：「對我哋嚟講無嘢㗎，又唔係夾開band，上台玩下當開心啫，本身我哋就有另一個session，但係天王星佢…我都唔知，唔通叫佢而家同男班長say sorry認低威咩，你諗下都知無可能啦，Yvonne話會幫手諗下辦法。」
易汪所講嘅辦法，睇怕都係…不過唔關我事。
我：「咁妳哋加油啦，我會期待妳哋嘅演出。」
Q：「唉，如果唔係幽蘭佢推波助瀾都未必使攪到咁，個衰妹有得玩重好似好興奮咁…不過，重點都係要今個禮拜完埋塊壁報版先，交功課畀班主任同樣重要。」
我：「妳覺得Miss佢今日係咪重係好down？」
Q：「知啦，不過呢排好唔得閒，無心情關心佢住…」
的確係嘅，同我鬧完架，然後仆去日本搵爹地，返到嚟又要繼續整壁報版同埋準備音樂日，理都理自己啲兒女私情先啦，例如聽日同條仔玩乜淫賤遊戲好…
然後話咁快就到咗第二日放學…
U：「非常好呀下，有咁多人肯留喺度幫下手…」




豬：「屈服係淫威之下㗎咋，鬼叫重要喺呢班撈落去…」
除咗女神五加一之外，留喺度嘅男仔有Myth，豬同龜，阿健同我，其實雅如佢哋都有問過使唔使幫手嘅，但心知肚明只係出於禮貌，而女神們都唔太想勞煩佢咁。
V：「嗱，呢度就係大家需要嘅硬卡紙盒…」佢打開班房儲物櫃，攞咗兩大袋嘢出嚟，大家可以幻想一下過百塊吉百利朱古力咁嘅size，全部閃閃生輝，重有幾種顏色。
慕：「嘩，啲盒靚到吖…呢個係面膜盒嚟？」
V：「應該係掛，我無研究過，最緊要純色同硬淨。」
慕：「犀利…到底有乜嘢係妳哋班唔到返嚟㗎。」
女神們，最叻就梗係班馬㗎啦…
U：「或者同大家講下個設計係點先，我哋打算喺中間呢個範圍整一個大型嘅元素週期表，除咗可以作為參考用之外，每一粒元素重係一個信箱，而元素編號就對應返我哋嘅學號，而呢啲盒就會攞嚟黐上去，我已經預先搵數碼鎅字鋪整咗一堆黑色嘅元素符號貼紙，所以大家只需要幫手黐上去就得。」
J：「咁因為我哋用呢個拼合式設計，所以大家只需要幫手攞返屋企整就得，呢度有第一個整好咗嘅氫氣樣本，可以見到上面個摺耳係鎅走咗嘅，如果大家方便就清咗佢啦，咁個盒係正方形嘅，希望大家可以將粒英文字貼喺正中間，而個元素編號就貼喺左上角，留返1cm乘1cm嘅邊界，貼嗰陣可以攝疊廢紙入去撐起個盒會易貼啲，呢度已經切咗一大堆啱size嘅，而黐嗰陣就對好位先，可以用啲memo紙mark起個位，唔好一次過搣晒成塊貼紙出嚟，應該由一隻角慢慢開始貼落去…咁我而家示範一下貼氦氣個H落去先呀下。」