thriXt Qantasy 純文字安眠之作 (New: - U2K - 一直上架): K602

睇嚟思韻係一個做開手工藝嘅女仔嚟，雖未至於鬼斧神工，但至少整整齊齊交到功課，遠睇唔會有瑕疵。
U：「嗱，我都知道要平整咁貼咁大張貼紙上去唔係一件易事嚟，話晒都有成差唔多十cm，所以大家唔使咁驚，貼衰咗唔使死嘅，及早通知我就得，過兩日我會再去搵人鎅，啲盒救得就救啦，其實我哋預咗buffer…咁我諗每人派十二個就差唔多…呀，Queenie妳係咪趕住去…」
Q：「嗯，咁我行先！我嗰份交埋畀佢先啦！」QQ手都懶得揮下就擰轉頭走咗，似乎佢真係好著緊工作。
Y：「你個女神對你真係好嘅啫。」
我：「無計啦，香港地…啲女仔大概嚟講都係差唔多。」
U：「你喺度夠膽講句咁嘅嘢真係未死過㗎喎，不過我就唔會咁對你嘅，始終呢啲公家嘢大家一齊做。」
健：「畀五個我啦，驚你黐到功課都無時間做呀。」
然後我哋就喺度分贓，啲盒嘅顏色係跟返傳統週期表，例如氣體，有機物，金屬嚟分類，都唔知幽蘭麻煩咗佢公司幾多人先搵到呢啲完美嘅材料…唔好以為貼幾塊貼紙好簡單，呢個癲婆重要貼到去Og118，一個盒最多要貼五粒…
分完贓，有啲人放喺櫃桶，有啲攞返屋企，而我…
U：「你唔係諗住想走人呀，PK仔。」




我：「無呀，咁我都要攞返屋企先㗎，妳唔覺得咁樣好怪嘅咩，明明我同妳就乜嘢關係都無，但就咁多人睇住妳留我喺度…」
U：「乜無關係呀，今年完之前你都係阿四嚟㗎！」
Y：「唔怪呀，Queenie都未出聲，無事嘅。」
豬：「唉，啲人咁重女重要喺度曬命，真難頂。」
慕：「好好享受啦…」講完佢哋就散咗。
U：「咁我而家去還匙嘞，你十分鐘之內好同我落返嚟。」明明咁多嘢做，點解佢唔可以抖返日…
單純同佢練空手道嚟講，其實係OK嘅，始終佢都係一個靚女，又可以做下運動；問題係我都會攰㗎嘛，有時對得太多靚女已經感到有啲麻木，而且又係睇得唔食得，開始懷念韻婷呢啲傻妹。
放低嘢，換套衫，換埋底褲就落返去。雖然對佢無乜特別感覺，但都唔想臭親QQ嘅好朋友嘅…
U：「嗱，幫我攞兩袋嘢，書包唔使你搦嘞。」
我：「又唔係重，做乜係要我幫妳，咁樣好睇咩？」




U：「鬼叫你次次返完屋企就兩手空空，而我喺你隔籬攞住咁多嘢，乜咁又好睇喇喎？」
我：「畀埋個書包我攞，等大家知妳係香港嘅女仔。」
U：「唔需要，你唔使咁多廢話，總之聽我話就得。」