為了實現媽媽遺願，我成為了女兒國唐僧: K590

以前屋企買電器，大多數係落樓下豐澤百老滙買最貴嗰款就算；而家同爹地行咗足足三四間電器铺，睇咗十款以上嘅暖風機，逐張牌仔研究下啲功能有乜唔同；雖然咁樣嘥兩個幾鐘嚟慳幾百円著實好無效益，但係我哋都好開心，因為以前根本就未試過咁，反正我哋而家啲時間就唔值錢。左揀右揀，最後我哋買咗部啱啱一萬円樓下嘅中國製暖風機，無計啦，呢啲新式小型電器好少日本造，有都係東南亞，所以性價比同埋受歡迎程度比較重要…
買完暖風機我哋又去咗超市掃嘢食，今晚嘅選擇比較關西風，有大阪焼，焼八爪魚丸，炒麺，焼汁雞扒…
話咁快就到咗星期日，今勻實在係名符其實嘅快閃東京，但我同爹地都好珍惜相處嘅每一分每一秒，因為下次再見可能已經係幾個月後。今日中午我又繼續用買返嚟嘅料煮返接近一模一樣嘅拉麺，只係多得商業化世界嘅偉大個湯底唔同咗，值得一讚係今日啲麺無再煮得腍得滯。
我係咁唔知醜自己讚自己㗎喇，吹呀！哼！
食完嘢我就收拾行裝，其實都無乜好執，然後同爹地徒步行去上野，為嘅就係嗰個我從來都無去過嘅動物園，以前無去係因為佢priority唔高，而家會去係因為唔使搭車同埋入場費夠晒平。上野公園好大而且整體設計唔錯，睇完動物同花花草草又順便去埋美術館，唔去都唔知自己爹地其實一直對書畫有興趣同曾經投資過…
話咁快就消磨咗幾個鐘時間，日落之後我哋去咗上野啲商場兜咗個圈，入咗一間普通嘅日式咖哩連鎖；以前嚟食親嘅都係和牛steak咖喱，或者乜乜出名豚，車海老嗰啲，閒閒哋都三五千円起標，而家當然食乜都無問題，千幾円一個set有頭有尾整整齊齊就已經好開心。
爸：「阿女，真係唔使我送妳去機場？」
我：「咪話咗唔使囉，為咗喺度陪多你半個鐘先買skyliner咋嘛，如果你陪我搭好嘥錢㗎，回程搭慢車會好辛苦，重唔知趕唔趕到尾班，你都係快啲返屋企早啲休息，聽日重要返工㗎。」
爸：「可以見到妳使乜休息，我一啲都唔攰。」
我：「咁就最好，總之要喺度乖乖生活，等我下次嚟探你知唔知，如果有嘢要我喺香港帶過嚟即管出聲。」




爸：「要等到下次…應該係好漫長嘅日子。」
我：「既然係咁，會唔會諗下遲啲返嚟香港？我知香港生活成本好高，但我唔介意窮㗎，就算同你住板間房我都OK，或者可以申請到公屋？最緊要你啲人事問題解決晒未，以你嘅經驗喺香港搵份普通銀行工應該唔太難？」