為了實現媽媽遺願，我成為了女兒國唐僧: K589

爸：「身處日本隨時都可以練日文啦，信我，呢啲妹妹仔煮嘅嘢食係唔會食得人嘅。」雖然佢無講啲乜，但我當然明白佢嘅箇中意思，既然要畀錢點解重要同啲妹妹仔玩煮飯仔，掂又唔掂得，睇又無乜嘢睇，喺錢唔成問題嘅時候就梗係直接買到盡。
我：「你咁講乜嘢意思呀！即係話我煮嘅都唔掂啫？」
爸：「點同，我又唔係幫襯妳。」
我：「橫掂一場嚟到，不如我哋試下幫襯女僕cafe？難得你識日文唔使口啞啞。」我應該無講錯掛，係無幫襯過呀，只係去兼職同埋商業合作咋嘛。
爸：「唔啦，咁樣好奇怪，如果妳係男仔就話帶妳去啫…」如果我係仔應該會想去六本木見識多啲…
我：「有乜咁奇怪，當上去食啲嘢啫。」
爸：「上得去嘅有邊個係為咗食嘢，個女僕其實做啲乜都係咁嘅樣，同你喺條街望住佢無乜分別。」
我：「哦，肯定係你之前上過去發覺中伏所以咁講。」
爸：「梗係無啦，我而家點會嘥啲咁嘅錢，只係諗都諗到啦，做得呢行嘅女仔都係想謴啲溝唔到女嘅薯嘜嘅錢。」
我：「咁又係，諗落真係六本木實際啲。」




爸：「唔好提喇，都已經過咗去…好多年。」
我：「但得一個人喺度咁悶，真係捨得唔去？」
爸：「睇住妳已經咁大個女，重點會再去呢啲地方喎。」
我：「但明明我未出世嗰陣…家姐佢都唔細㗎喇喎。」
爸：「咁唔會再喺身邊…重要隔咗成個太平洋。」
我：「咁我哋而家都隔咗個東海。」
爸：「吖，乜妳好想爹地去六本木咩？呢啲地方會上癮㗎，去得一次就有第二次，好難抽身。」
我：「你去玩下嘅話好似會後生啲吖嘛，同埋…就算你而家去識下妹妹仔，又唔會話對唔住邊個嘅。」
爸：「傻女嚟嘅，每個人都會老，妳都會大個，我可以睇住妳成長就已經夠晒。」
我：「嗯，放心啦，我一定會再嚟睇你㗎，不過就算你再去六本木我都唔會怪你，如果識到姨姨或者姐姐嘅話我會同佢哋好好相處㗎，雖然就唔會嗌佢做阿媽。」




爸：「有緣份至算啦，我已經過慣咗一個人清幽嘅生活。」其實我明嘅，自從我升中之後，媽咪已經無乜理過爹地，只係叫做乖乖一齊生活，爹地又無乜特別需求，其實早就慣晒自得其樂，反正年輕嗰陣乜都試過…
秋葉原呢度真係有好多女僕，另外有啲地下偶像女團喺條街度跳唱，重有啲著得比較性感嘅姐姐舉牌寫住飲放題二千円咁，唔知上去可以做啲乜呢？如果交叉仔喺度一定又會講埋啲飲呢樣飲嗰樣嘅變態嘢…相對哋，呢條街啲仔嘅外表實在係一言難盡；唉，搵錢真辛苦。