係同屋失友？定係同居勿友？只想同妳做普通朋友…🤦🏻‍♂️: K591

爸：「算啦，重點唔喺度…以前前妻一走了之，好似話咁多年都無再返過香港，而家輪到我唔多想返去呢笪地方…總之，難得我喺度安定落嚟，暫時都會留喺度㗎喇，呢度生活比較清幽，我其實幾鍾意。」
我：「咁，我都理解嘅，嗱，如果喺日本識到姐姐嘅話記住下次介紹畀我識，不過到時可能你要買多張被鋪。」
爸：「邊有咁易吖，妳先係呀，如果識到男朋友可以下次帶埋佢嚟玩，妳可以放心我好識做㗎，唔會比壓力佢。」
我：「邊有咁快喎，遲啲先算啦…」
爸：「爹地睇過嘅女仔都唔知有幾多個，妳呃唔到我，妳唔會係唔走去識男仔嗰啲，不過妳鍾意啦，要收收埋埋我都阻妳唔到，但記住中伏唔好喊。」
我：「得喇，長氣，我一定會識到個見得人嘅先會帶佢嚟見你，絕對唔會搵個不良少年激死你嘅。」
爸：「其實呢個年代女仔玩下都無乜嘢嘅，識得保護自己就得，重有記住唔好用外表同物質去衡量一個男仔呀，搵個肯惜妳嘅先係最緊要…」
我：「哎吔！我十五歲咋，做乜諗住即刻嫁我出去咁…」
爸：「曾幾何時，我都識過幾個十五歲嘅女仔…」
我：「呀！我唔想聽呀，你鍾意就走去識啦，呀，唔好！十五都係唔得，最少要大我三年呀！」




爸：「莫講話三年，三十年都唔易…呀，妳班車好似就開喇，我諗我哋要快啲起行。」
我：「唔使咁急喎，上野站咪喺商場隔籬囉。」
雖然上野站係一個迷宮嚟，但嚟過咁多次，我都知道見到JR logo就要避開，搵下搵下就會搵到京城個站。
我：「我入閘喇，下次嚟之前會同你講。」
爸：「咁就啱喇，千祈唔好畀驚喜我，我有時會攞假去其他縣玩㗎，如果我唔喺度就麻煩，重有記得幫手睇住妳阿媽呀，妳都知佢重傻過妳，唔好俾佢出事…」
然後我就揮揮手入咗閘，行去月台上車。我媽咪…點理到佢喎…叫佢返工？零工作經驗；叫佢唔好使錢？連我都於心不忍；叫佢搵個好男人？有邊個正經男人肯埋呢張單…倒不如問下佢服侍得個男人好唔好好過，有無幫佢出晒啲精，妳又有無高潮咁呢…唉，其實我幼稚園嗰陣都知媽咪係貪爹地啲錢，而爹地就鍾意媽咪後生靚女；不過十幾年後乜都貶晒值啦，唔通爹地重會貪圖媽咪嘅美色咩，況且而家又無晒錢。以前覺得咁樣交換需求係好合理，但事實話我知所有嘢其實脆弱不堪，而家嘅我只希望佢兩個都可以過得好地地，身邊有啲乜嘢人我又邊管得著吖。